Tottenham tan tlak a hnai zel

Ange Postecoglou-a'n Tottenham Hotspur coach a nih khan, "Season hnihnaah nomawi ka chawi zel," a ti a, a sawi ang ngeiin an season hnihnaah Spurs chu a champion pui a, Europa League nomawi an chawi.

Australian coach hian Europa League nomawi an chawi champion lawmnaah, "Tv series zawng zawng hi season two ai chuan season three a hmuhnawm zawk vek," a ti a, Spurs-ah ropui lehzuala hnathawh a tum.

Mahse, Spurs-in league lama an result chhuanlamin Postecoglou an ban zui a, March, 2026 a herchhuah meuh chuan Tottenham-in Championship lama tlak an hnaih ta zawk.

Spurs hian Pathianni zan khan an mikhual Nottingham Forest chu relegation battle-ah 3-0 in an ngam lo a, Igor Jesus, Morgan Gibbs-White leh Taiwo Awoniyi ten goal khat ṭheuh an khung.

Tlak hlau

Champions League round of 16 aṭangin Spurs tla mah se, Atletico Madrid chu 3-2 in an hneh a, hemi hma chiah hian league-ah Liverpool chu 1-1 in an draw bawk - Igor Tudor hnuaiah beiseina an nei thar.

Forest lakah pawh Spurs hi bul ṭan ṭha zawk an ni a, a pawi ta ber erawh a pawimawh ber goal an khung lo chu a ni. Minute 45-naah Spurs fan-te ngawihtir turin Igor Jesus a inlar a, Neco Williams-a siamsak chu a tauh lut.

Forest-in 1-0 in hma an hruai a, Spurs hian Mathys Tel hmanga chhanlet nghalna remchang nei mah se, bar a tihper. 1-0 in chawlhlawk an hmang a, Forest bawkin second half-ah goal an khung.

Vengtu nei lo Gibbs-White chuan Callum Hudson-Odoi-a 'cutback' chu an goal hnihna turin a khung a, hun tawp nan minute thum chauh a awm tawh tihah Awoniyi chuan chak nemnghehna a khung zui - 2-0 a nih laia Spurs tan Lucas Bergvall-a'n a chance neih a chhawr lote chu a ui vawng vawng ang.

Spurs an zawr

December 28 hnuah Spurs hian league-a chak an la nei leh ta lo a, an league match hnuhnung pasariah vawi ruk an tlawm - an tlawm loh chhunah pawh draw result bak an hlawh chhuak chuang lo!

Tottenham-in an beisei ang result an neih loh avanga Thomas Frank an ban khan, mi tam tak barakhaihin Igor Tudor chu season tawp thlenga coach turin an la lut a, Croatian coach hi club a enkawl ṭantirh lama result a neih ṭhat ṭhin avanga la lut niin an insawi.

Mahse, Tudor hian Spurs hi inelna hrang hrangah match sarih kaihruai tawhin, vawi nga ngawt a tlawmpui ta a, tunah meuh chuan Spurs hi tla thei dinhmunah an ding ta mek.

Spurs hian relegation zone-a awm chin West Ham aiin point khat chiahin an hmu tam a, match sarih khelh tur a la awm. Tudor ban an sawi ri ṭan a, Sean Dyche, Ryan Mason leh Harry Redknapp te hming a ri - he thuziak i chhiar meuh chuan an inban fel tawh hial mai thei.