MSL relegation leh semifinal ṭan zan

Mizoram Super League season 11-na league round khelh zawn a ni tawh a, zanin aṭangin R. Dengṭhuama Indoor Stadium-ah relegation leh semifinal game khatna khelh a ni dawn.

Dar 5:30-ah Saron BC leh Chhinga Veng BC ten relegation game an khel dawn a, dar 8:30-ah Khatla TBL leh Mission Veng Hotshots ten semfinal an khel dawn bawk.

Inhamtan tumna

MSL 11-ah Saron BC ten bul an ṭan ṭha a, match hmasa berah Khatla TBL an hneh nghal. Mahse, Saron par chhung a rei lo a, league stage khelh zawh a nih meuh chuan relegation game an khelh a ngai tawh.

League round-a Saron-in Chhinga Veng BC an hneh ṭumin, captain T. Lalhriatzela leh an foreigner Hugo S Chotter te an khel ṭha a, point 20 an score tling ve ve. Zaninah hneh leh an tum a nih chuan anni pahnih bakah player dangte an khelh ṭhat tel a ngai tawh ang.

Saron BC coach Marc Lalthlamuana Sailo chuan,"Chhinga Veng BC hi kan hneh tawh avangin kan fimkhur a ngai zawk a, MSL level-ah chuan tumah zuam chi an ni lo. Mahse theihtawp kan chhuah ang a, inhamtan kan tum hle," tiin Vanglaini a hrilh.

Hetihlai hian Chhinga Veng BC tan an ram pawn player King Revolution chu an innghahna a ni leh dawn a, Revolution hian league-a Saron BC an hmachhawn ṭumin point 44 zet a score thei a, zaninah chak an tum a nih chuan a teammate ten an thlawp ṭhat a ngai dawn.

Final luh inchuh

Inkhel hnuhnung zawkah Khatla TBL-in Mission Veng Hotshots an hmachhawn dawn a, semifinal a nih bakah club pahnihte hi intumtawk tak tur an ni a, inkhel hmuhnawm a beisei ngam.

League round-a an inkhelh ṭumin TBL an chungnung zawk a, player paliin point 10 an score tling a, an captain Vanlalṭhazuala hoin hnehna an chang.

Zaninah pawh hnehna chan ngei an tum dawn a, Ṭhazuala bakah Emmanuel VL Awmpuia leh an ram pawn player te chet ṭhat a pawimawh dawn a, a vawi li nan Mizoram basketball inelna sang berah champion an tum ang.

TBL hmachhawn tur Hotshots tan an foreigner Darnell Johnson chu an innghahna tur a ni leh dawn a, Johnson hi tun season-a player hmuhnawm bera chhal ngam a ni.

Johnson thlawp turin an captain Lalruatkima, Japjit Singh Gill leh tawnhriat nei ṭha Moses Zoremmawia te an awm dawn a, Hotshots-in game 1-a hnehna chang turin theihna sang tak an nei.

Hotshots coach Vanlalhruaitluanga chuan,"Squad pan zawk kan ni a, league round-a kan inkhel aṭang khan a hriat. Mahse champion tum ngei kan tum a, practice pawh kan bei ngawrh a, a hma aia ṭhain kan khel chhuah thei kan inbeisei," tiin Vanglaini a hrilh.