Aston Villa tan beisei a sang

Tun hnaiah beisei ang result nei thei lo mah se, Aston Villa an insiamṭha a, season tharah Champions League khelh ngei an tum tih pholangin, an mikhual West Ham chu 2-0 in an hneh.

Season bul ṭan ṭha tak Villa hian Hammers an mikhual hmaa an league match hnuhnung paliah chak an nei lo a, vawi khat draw neiin, vawi thum ngawt a zawnin an tlawm hman.

Mahse, Pathianni zanah tlak hlau West Ham mikhualin, minute 15-na lekah goal an khung nghal a, captain John McGinn chuan Jadon Sancho siamsak chu goal-ah a chantir - goal ṭha bik a ni a, training aṭanga chhuak tih a chiang.

Tlak hlau West Ham-in Villa an chelh meuh lo a, Villa vanneih zan ni se, goal tam zawk khung thei an ni - Watkins-a'n a chance neih vawi hnih ngawt uiawm takin a hlah a, Lucas Digne pawh a vanneih zan a ni lo.

Villa hian penalty an hlawh chhuak emaw an inti a, Konstantinos Mavropanos chu Watkins lakah a foul-ah ngaiin referee Paul Tierney chuan penalty spot a kawk.

Mahse, video assistant referee (VAR) a rawn hnuah a ngaihdan a thlak. Ollie Watkins hian goal erawh a khung tho a, minute 68-naah chak nemnghehna a khung - England squad-a ko lotu Thomas Tuchel tan ngaihtuah tur a pe.

Villa hi EPL table-ah palina an nih chhunzawm a, parukna Chelsea aiin point rukin an sang zawk mek - Europe inelnaa EPL club la dam zinga tu emaw berin draw result chauh pawh hlawh chhuak se, UEFA Co-efficient ranking-ah England hi top two an ni chiang dawn.

Chuti a nih chuan England-in Champions League-ah spot an neih belh dawn tihna a ni a, season thar UCL-ah Premier League club panga an inlan ngei dawn tihna a ni.