Derby hmuhnawmah Real an chak

Spanish club lian Real Madrid an chesual duh tawh lo a, Pathianni zan khan Madrid club pakhat zawk Atletico Madrid 3-2 in an hneh a, an hmelma Barcelona thlah loin pahnihnaah an awm chhunzawm zel.

Pathianni zan inkhelah hian Real tan Vinicius Junior-a'n goal hnih a khung a, Federico Valverde-a'n goal khat a thawh ve bawk. Atletico tan Ademola Lookman leh Nahuel Molina ten goal khung mah se Atletico chak nan a tawk lo.

Derby hmuhnawm

Santiago Bernabeu-a inkhelah mualneitu an hlauhawm nghal a, Real hian Barca an chak tih hre chungin an khel a, an khel a nung hle.

Minute thumna lekah Dani Carvajal-a'n goal a khung nghal teuh hle a, Atletico keeper Juan Musso-a'n a dansak. Valverde hlauhawm chhunzawmin, chak takin ball a tlanpui hnuah goal ban a pet per a, Atletico an him hlauh.

Team pahnihte an innawr tawn hnuah goal a lut a, a khungtu erawh mikhual team an ni. Minute 33-naah Matteo Ruggeri cross chu Atletico coach Diego Simeone fapa Giuliano Simeone-a'n mawi takin Lookman tan a kheng a, Lookman-a'n hnai tak aṭangin a khung a, Atletico-in hma an hruai. Real defender ten Lookman an veng ṭha tawk lo.

First half tawp hma hretin Real tan Aurelien Tchouameni leh Arda Guler ten chance an nei a, Musso an paltlang thei lo a, 1-0 in chawlhlawk an hmang.

Second half-ah pawh Real bawk an hlauhawm a, minute 52-naah Brahim Diaz chu Dávid Hancko-a'n a tihtluk avangin penalty an hmu. Penalty aṭangin Vinicius Jr-a'n ṭha taka pet goal-in, an si phurh a sut.

Real an phur laklawh a, minute thum hnu lawkah Valverde-a'n Atletico defender José María Giménez ball chhuhsakin goal kilah tak a pet lut nghal a, Real hma a hruaipui. Uruguayan midfielder hian goal a khung theih nan Atletico defender te pressure pek hun a hre takzet.

Goal hnih chhuah mah se Atletico an zam lo a, minute 66-naah Molina-a'n ding lam sira a ball hmuh chu tibuaitu a neih hmain goal kilah tak a pet lut a, Real keeper Andriy Lunin tan dan ngaihna a awm lo, goal mawi bik a ni.

Atletico lawm chhung a rei lo a, minute ruk hnu lawkah Vini-a'n vei lam sir aṭangin ball a la lut a, mawi takin goal-ah pet kual lutin, Real chakna goal a khung.

Los Blancos lawm hman viau mah se, minute nga hnu lawkah Álex Baena a rah palh avangin Valverde-a'n red card a hmu. Valverde hian hnung lam aṭangin Baena ball chhuhsak a tum a, a keah a rap palh, red card hmuh nan erawh a nem hret.

Player kim lo Real an talbuai chhunzawm a, Julian Alavrez-a shot-in goal ban a per a, Alexander Sorloth leh Baena te chance neih chu Lunin-a'n a dansak bawk avangin Real an him hram a, 3-2 in an chak.

Eng nge an sawi?

Inkhelh banah Real coach Alvaro Arbeloa chuan,"Season laklawhah team ka enkawl avangin a harsa a, mahse tunah chuan ka player te ka hrechiang tawh a, hma an sawn a, kan ṭhat dan berin kan khel chho mek. Mahse kan hmabak a ko a, player te pawhin an theihtawp an chhuah a ngai dawn.

Arbeloa hian Jose Mourinho, Pep Guardiola leh Diego Simeone te a hneh tawh a, a season khatna atan record chhia a ni lo a, inrintawkna nasa tak a neih phah ang.

Thu lawmawm

Atletico an hneh bakah Real tan thu lawmawm a awm a, hliam vanga an chawlh deuh vang vang hnuah Jude Bellingham leh Kylian Mbappe te an dam tawh.

Bellingham leh Mbappe te hian bul ṭan lo mah se bench aṭangin an lut a, danglamna erawh an siam lo.Arbeloa naute hian La Liga leh Champions League-ah champion an la inbeisei a, Mbappe leh Bellingham te hi an pawimawh dawn.