Inter an chelh leh tawh

Serie A hmahruaitu Inter Milan chu Pathianni zan khan Fiorentina lakah hnehna an chang zo lo a, 1-1 in an inhnehtawk a, an hmelma AC Milan nen point nga chauhin an in thlau tawh.

Pathianni zan inkhelah hian Inter tan Pio Esposito-a goal khung chu an hum zo lo a, Cher Ndour-a'n Fiorentina tan a sut.

Artemio Franchi Stadium, Florence-a inkhelah mikhual team-in goal an khung hma a, minute khatna lekah Nicolo Barella cross chu Esposito-a'n a tauh lut a, a team hma a hruaipui.

Goal a khung theih nan Esposito a insiamrem ṭha hle. Italian rawlthar hian Serie A-ah goal nga a khung tling chiah. Esposito hian chance nei chhunzawm mah se goal a khung tawh lo.

Fiorentina-in first half-ah chance an insiam hleithei lo a, Moise Kean-a'n goal ruaka a tlawh goal loh chu an chance neih ṭhat ber a ni.

Mahse Fiorentina an vanduai reng lo a, minute 77-naah Albert Gudmundsson-a shot chu Inter keeper Yann Sommer-a'n dang mah se, Cher Ndour-a'n a per chu hnai tak aṭangin a khung a, Sommer tan dan ngaihna a awm tawh lo.

Hun tawp hma hretin Esposito-a'n chance a nei leh, a tharum ngahna hmanga a insiamrem hnuah a pet nghal a, Fiorentina keeper David De Gea-a'n a dansak hlauh. Manchester United keeper hlui hian Fiorentina a chhanhim a, team pahnihten point khat an insem.

Inter hi hmahruaitu la ni tho mah se, an chak zawh loh avangin Milan nen an inhnaih sawt a, pathumna Napoli nen an inthlauhna point sarih chauh a ni tawh bawk.

Serie A-ah match riat chiah khelh tur a awm tawh a, Cristian Chivu naute hi Champion an tum a nih chuan an chetsual a thiang tawh lo.