Newcastle an tlawm leh tawh

Champions League round of 16 aṭanga Barcelona-in an petchhuah hnuah Newcastle United chuan Pathianni zan khan Sunderland an mikhual a, Barca laka 7-2 ngawta an mualphona hliam pawh a dam fel hmain Black Cats hian an hliamah chi an phul belh.

Newcastle tan season duhawm tak hmangtu Anthony Gordon chuan minute 10-na lekah goal hmahruai a khung a, mahni khelmuala inlan Magpies hian beiseina an nei sang hman hle.

Mahse, minute 57-naah Chemsdine Talbi chuan Sunderland tan si phurh sutin, minute 90-naah Brian Brobbey chuan a khung belh bawk a, a tawpah 2-1 in Black Cats an chak.

Premier League table-a 12-na ni mek Newcastle tan tun season-a league match 31 an khelh tawhah vawi 13 an tlawmna chiah a ni a, Eddie Howe-a team hian Premier League Big Six zinga tel ve an tumna kawngah kawng dik an zawh hleithei rih lo.