Miami Open-ah Alcaraz a tlawm

World number one Carlos Alcaraz chu Miami Open third round aṭangin a tla a, awlsam taka a paltlang tura ngaih Sebastian Korda chuan 6-3 5-7 6-4 in a hneh.

Kum 22 mi Alcaraz hi first set aṭangin a talbuai a, a hnuah insiamṭha leh hret mah se, Korda-a'n Spanish tennis star hi a zuam laklawh a, rin loh takin a tawpah hnehna a chang ta zawk.

Alcaraz chuan hnehna chang zo lo mah se, hma a sawn zel thu sawiin a khelh danah a lawm tawk. Australian Open champion Alcaraz chuan, "Hma ka sawn zel a, vawiinah tlawm mah ila, ka ngaihdanah chuan kawng dik ka la zawh zel a ni.

"Tournament hmasa lam ṭhenkhatah nuam ka ti tawk lo a, tun ṭum erawh nuam ti takin inelna ka hmachhawn," a ti a, third round lekah Miami Open mangṭha ngai mah se, a hnual phah lo.

Alcaraz chuan Korda chungchang sawi zuiin, "Keini aia pressure nei lo zawk an ni ṭhin a, anmahni delh rittu awm miah loin an khel thei a ni.

"Chutihrual chuan keipawhin pressure ka nei hran lo a, a ṭha thei ang bera khelh kha ka tum mai a ni," a ti a, boruak zangkhai tak hnuaia inkhel a hmachhawn thu a sawi.

Alcaraz hnehtu Korda hi world no 36 niin, nikum Miami Open veka world no 55 David Goffin-a'n Alcaraz a hneh hnua Spanish player ṭha bik hneh thei zinga ranking hniam ber a ni.

Kum 22 mi Alcaraz hian kumtirah Australian Open nomawi chawiin, Grand Slam-a vawi sarih a champion-na chiah a ni. March 15 khan Indian Wells semifinal-ah Daniil Medvedev ngam loin, tun season-a a tlawm hmasa ber a ni a, tunah a tlawm leh ta.

Rin loh taka Alcaraz hnehtu Korda chuan, "A nuam takzet. Mahse, kan inkhel rei hret a, ka duh ai chuan a hahthlak! Mahse, ka khelh danah erawh ka lawm.

"Beiseina ka nei tlat a, han talbuai deuh ṭhin mah ila, a tawp ka khar ṭha thei ta a ni," a ti - darkar hnih leh minute 19 an inkhel.