East Bengal-in Mohammedan an sawp

International break hmaa Indian Super League match hnuhnung berah East Bengal-in goal an surtir a, an mikhual Mohammedan SC chu 7-0 ngawtin an sawp.

East Bengal tan Anwar Ali leh Youssef Ezzejjari ten goal hnih ve ve an khung a, Saul Crespo (penalty), PV Vishnu leh Nandha Kumar ten goal khat ṭheuh an khung bawk - Ezzejjari goal khung pahnih hi penalty aṭanga lut ve ve a ni.

Red and Gold Brigade-in hnehna an chan chiah hian, ISL-a chak chiang ber record ding lai an nih rual nghal. Kum 2015 khan FC Goa chuan Mumbai City chu 7-0 ngawtin an lo sawp tawh a, kha record kha East Bengal hian an nih rual ve leh ta chiah.

East Bengal hian first half chhungin goal thum an khung hman a, heng zinga goal hnih chu penalty aṭangin a ni - East Bengal penalty chawi zingah Joseph Lalmuanawma-a penalty chawi a tel a, Mohammedan defender hian yellow card pahnih hmuin, hnawhchhuah a ni bawk.

Player tam zawka an khelh hnuah phei chuan East Bengal tan Mohammedan hneh chu thil harsa a ni lo - second half-ah goal li an khung belh a, Kolkata club hian champion beiseina an nei thar ve leh ta.

East Bengal tan match thum a zawna an chak zawh loh hnua an chak leh vawi khatna a ni a, champion beiseina a nung thar - point thum chauhin hmahruaitu Mumbai City an phak lo.

Thawhṭanni zan inkhelah hian East Bengal tan Edmund Lalrindika'n inkhel bul ṭanin, David Lalhlansanga chu bench aṭangin a lut bawk - Mohammedan lamah Lalthankima leh Joseph Lalmuanawma ten bul an ṭan.

Bench aṭangin Rochharzela, Lalremsanga Fanai leh Lalngaihsaka te an lut bawk a, mahse, Mohammedan tan East Bengal an sang hret a, player kim loa minute tam zawk an khelh bawk avangin an mualpho.