Freekick pet thiam Payet-a'n inkhelh a chawlhsan

West Ham United midfielder hlui Dimitri Payet chuan inkhelh a chawlhsan thu a puang a, Payet hian Pathianni zana Marseille leh Lille an inkhelh ṭumin, halftime interview-ah a chawlh thu hi a puang.

French midfielder Payet hian AS Excelsior-ah a career a ṭan a, kum khat a khelh hnuah French club hrang hrang - Nantes, Saint Etienne, Lille, Marseille-ah te a khel kual a, freekick pet a thiam avangin ngainatu pawh a ngah hle.

Khawvelin hriat a hlawh ṭanna tak erawh 2015-a West Ham tan a khelh khan a ni. Hammers tan Payet a vul a, a season khatnaah goal kua khungin assist 12 a nei nghal a, pasarihnaah West Ham hlangkaiin Premier League-ah a tlangnel nghal hle.

Kum 2017-ah Marseille-ah bawk a kir leh a, 2023 thleng a khelhsak. Vasco da Gama zawm lehin Brazilian club hi a khelh hnuhnunna ber a ni.

France tan Payet hi vawi 38 a inlan hman a, goal riat a khung hman a, Euro 2016-ah France midfield innghahna ber a ni. 2018 World Cup champion squad-ah a inhliam avangin a tel ve lo thung.

Payet hian a career-ah goal 158 khungin assist 205 a nei a, mimal chawimawina a dawn bakah a khelhna league hrang hrangah team of the season-ah vawi tam a lang bawk. A lawmman lak zingah Marseille Player of the Season leh PFA Team of the Year te chu a langsar zual an ni.

Kum 38 mi Payet chuan,"Kum 20 football ka khelh chhunga ka khelhpui tawhte chungah ka lawm a, nangmahni avangin hun danglam tak hmang thei ka ni.

Thliarkar te tak te aṭangin bul ka ṭan a, professional nih hi ka duhthusam a ni a, ka duhthusam ka tihhlawhtlin bakah ram tan ka inlan thei bawk a, vawiin hi ka zinkawng a tawp ni chu a ni," tiin football a mangṭha.