Griezmann-a'n Orlando pan dawn

Atletico Madrid forward Antoinne Griezmann chuan free transfer-in Orlando City a zawm dawn a, July thlaah Major League Soccer khel turin Orlando hi a pan dawn a, jersey no. 7 a ha nghal dawn niin journalist rintlak Fabrizio Romano chuan a tarlang.

Griezmann hian Pathianni zana Real Madrid an hneh loh hnuah, Orlando City nen inremna nei tura zin phalna an pe a, tun karah contract ziak turin a inruahman a, kum hnih emaw kum thum daih contract a ziah a rinawm.

French forward Griezmann hian tun season inelna hrang hrangah goal 13 a khung tawh a, Atletico tlarhma innghahna pakhat a ni. Mahse Griezmann hi a kum a tam ve tawh a, a career tawp lamah inelna sanga la tel ai chuan USA lam pan a rilruk ta zawk niin a lang. 2024 September khan ram tan inlan tawh lo turin thutlukna a siam tawh bawk.

Kum 35 mi Griezmann hian 2009 khan Real Sociedad-ah a professional career a ṭan a, 2014-ah Atletico a pan. Atletico tan kum nga a khleh hnuin Barcelona a zawm a, Barca-ah beisei a phak loh hnuin Atletico-ah bawk kir lehin Europe-a a club hnuhnung ber tur a nih a rinawm tawh.

Atletico tan Griezmann hian goal 211 khungin, ani aia khung hnem an awm lo. Match 488 khelhsak tawhin club tana inlan hnem lamah palina a ni bawk a, a career-ah La Liga-ah chiah a la inkhel a ni.

Nomawi chawi lamah pawh French forward hi a duai lo a, Atletico tan Europa League, UEFA Super Cup, Spansih Super Cup te a chawiin Barca tan Copa del Rey a chawi hman bawk. Mahse season 16 chhung La Liga a khelh chhungin league title a chawi lo thung.

Mimal lawmman pawh a hui nual a, Euro 2016-ah Player of the Tournament leh top scorer a ni a, 2018 World Cup-a France an champion ṭum khan Silver Boot leh Bronze Ball a hawn a, 2015/16 season-ah La Liga Best Player atan thlan a ni bawk.