Mercedes-ah Russell nghet lo em ni?

Formula 1 driver hlui, Johnny Herbert chuan Mercedes-a George Russell hma hun a chiang lo niin a sawi a, Russell dinhmun a chiang lo mek.

Russell dinhmun chian loh chhanah Max Verstappen hming a ri tel a, Herbert chuan, "Tun hnaiah Verstappen hi a team Redbull-ah a lungawilo a, Mercedes-ah insawn a duh nia sawi a awm. Mercedes a zawm a nih chuan Russell hi a chhuak ngei ang," a ti.

Season ṭan hmain Russell leh Verstappen te hian boruak an nei tawh a, Russell hian Verstappen nen inel a chak thu a lo sawi tawh. Russel chuan,"Mipuiten Mercedes leh McLaren te hi inel turin an beisei ṭhin a, a chhan chu Mercedes hian engine a neih ṭhat ber vang a ni.

Mahse tunah chuan team dang pawhin engine an nei ṭha tawh hle a, Red Bull pawhin car an nei ṭha tawh a, chuvangin Max (Verstappen) pawh a phur tawhin a ṭan ka ring a, mimal taka inel ka châk hle," tiin a lo sawi tawh a, tun hnaia a dinhmun chian loh avangin a thil sawi hi an thar thawh mek.

Hetihlai hian Verstappen erawh endurance race, Nurburgring-a neihah a vawi khat nan telin a team a chakpui nghal. Mahse motor ke paruk aia tam hman phal loh a nih laiin pasarih an lo hmang palh a, Verstappen leh a team hi an disqualify.

Nikum October khan Russel hian Mercedes tan 2026 season tawp thleng daih tur contract a ziak a, an inremnaah a Russell hi a che ṭha a nih chuan 2027 thleng a cham dawn a, a kutah a hma hun a innghat.

Kum 28 mi Russell hi a chet ṭhat lai tak a ni a, season bul a ṭan ṭha a, Australian Grand Prix-ah chak nghalin kar hmasaa Chinese Grand Prix-ah pahnihna a ni leh a, a teammate Kimi Antonelli a tluk lo.

March 29, Pathiannia neih tur Japanese Grand Prix-ah pawh Russell hi rinkai a ni leh dawn a, pakhatna nih leh ngei a tum ang.