Lakers-in Pat Riley chawimawi

Los Angeles Lakers chuan an coach hlui Pat Riley chu Pathianni zan khan chawimawina an nei a, Lakers home stadium Crypto.com Arena pawnah a lim an dintir.

Riley hian1981 aṭanga 1990 khan Lakers hi a enkawl a, NBA Finals vawi sarih hruai thlengin title vawi li a lakpui hman. Lakers hian Riley hma hian club legend Elgin Baylor, Kobe Bryant, Shaquille O’Neal, Jerry West, Magic Johnson, Kareem Abdul-Jabbar leh commentator lar Chick Hearn te lim an lo siam tawh.

Kum 80 mi Riley chuan,"Engtin nge helai hmunah hian ka awm ka hre lo, mahse tunah chuan pawnah ka lim a lo ding ta der mai. Chawimawina min pe hi ropui ka ti takzet a, ka player enkawl tawhte zara he chawimawina dawng ve thei chauh hi ka ni," tiin a sawi.

Hetihlai hian Lakers hi nimin zingah 113-110 in Detroit Pistons an hneh lo a, Luka Doncic (32) leh Austin Reaves (24) te che ṭha mah se hnehna an chang zo lo.

Pistons hi Eastern Conference-ah pakhatna an ni a, playoff khel turin an tling tawh. Lakers erawh pathumnaah an awm chhunzawm zel a, playoff khel turin an la tling lo. Lakers hian playoff khel turin vawi hnih tal chak an la mamawh a, an hnuaia awm Phoenix Suns emaw Los Angeles Clippers te an chak lo a nih chuan an kawng a awlsam thei thung.