Kum thum hnuah White an ko

Arsenal defender Ben White chu March 27 leh 31-a friendly match an khelh turah England tan koh a ni a, kum thum hnua England-in an koh lehna hmasa ber a ni.

Kum 27 mi White hi England tan a inlan hnuhnun ber chu March 2022-a Ivory Coast nen friendly match an khelh ṭum kha a ni a, hemi hnu hian Camp chhuahsanin khatih laia England coach, Gareth Southgate nen an inhmuthiam lo a, Southgate-a'n a enkawl chhung chu inlan lo turin thutlukna a siam.

Tun season-ah White a inkhel tam lo a, Arsenal tan vawi sarih chiah a la inkhel. Mahse Jarell Quansah a inhliam a, Bayer Leverkusen defender hi a malah hliam a tawrh avangin a chawlh a ngai a, Thomas Tuchel-a'n a thlak nan White hi a ko.

Nikum September khan White hi Tuchel-a'n koh a lo tum tawh a, mahse a khup hliam vangin a inhnukdawk a, Serbia leh Andorra te a hmachhawn ve lo.

Brighton tan White hi a laiah khel ṭhin mah se, Arsenal a zawm hnuah right back-ah chhawr a ni a, Three Lions tan right back a khel thei an tam avangin hmun a chang meuh lo. Mahse White tan hun ṭha a inhawng a, koh chhunzawm zel tlak turin khelh ṭhat a tum ang.

Three Lions hian March 27, Zirtawpniah Uruguay nen an inkhel dawn a, a kar leh Thawhlehniah Japan nen an inhmachhawn leh ang.