FA Cup fourth round Manchester khaw club chak laiin Reds chak zo lo

FA Cup fourth round-ah Manchester City leh Manchester United ten chiang takin hnehna an chang a, Liverpool erawh League One club Shrewsbury khelmualah an chak zo lo. 

Manchester City-in 4-0 ngawtin Fulham an sawp a, Ilkay Gundogan leh Bernardo Silva ten goal khat ve ve khungin Gabriel Jesus chuan goal hnih a khung thung. United-in Tranmere Rovers hmachhawnin goal ruk an khung a, Harry Maguire, Diogo Dalot, Phil Jones, Jesse Lingard, Anthony  Martial leh Mason Greenwood ten goal khat ṭheuh an khung. 

Liverpool erawh 2-0 ngawta hma an hruai tawh hnuah si phurh an insut zawh tir a, League One club laka an khelh danah lawmna tur a awm lo - Anfield-ah replay khelh a ṭul dawn 

tihna a ni. 

Etihad Stadium-ah Championship club Fulham tan hnehna chang turin thilmak a thlen tel a ṭul a, mahse minute rukna lekah he thilmak hi a thleng dawn lo tih a chiang nghal. 

Fulham defender Tim Ream chuan penalty box chhungah Gabriel Jesus a ti tlu a, penalty a chawi tel bawk - Ilkay Gundogan chuan goal-ah a chantir a, player inzat chung pawha rin hlawh lo zawk Fulham tan beisei a tlem. 

City-in an tam zawk leh thiam zawkna an chhawr zui a, Silva chuan minute 19-naah goal khat a rawn thawh belh. Second half-ah Jesus chuan goal hnih a rawn khung ve leh a, an chak chiang hle. 

City boss Pep Guardiola chuan, "Team tawhkhirh tak an ni a, a tirah kha chuan ka hlauthawng ve hman. Mahse, red card khan kan team tan a ṭha zawngin hna a thawk a ni," a ti. 

Tranmere khelmuala inkhelah United fan-ten club neitu Glazer chhungkua leh  executive vice-chairman Ed Woodward duh lohna thu an au pui a, United player-ten goal ruk hmangin an chhanglet thung. 

Harry Maguire leh Diogo Dalot  te chuan Red Devils tana an goal hmasa ber an khung a, Jones chuan March 2014 hnua a vawi khat nan United tan a khung ve leh ta bawk a, Lingard, Martial leh Greenwood (penalty) ten kut ruaka haw an duh bik lo. 

Manchester United manager Ole Gunnar Solskjaer-a'n player a rem dan aṭangin chak a duh tih a hriat a, a duh ang result a hmu. Norwegian boss chuan, "Result ṭha hlawh chhuak a, kawng dika club hruai zel hi kan tum chu a ni. 

"Fan-te chu hnehna kan chanin an hlim mai ṭhin a, chutiang taka an hlim reng theihna tur chuan theihtawp chhuah zel kan tum dawn a ni," a ti. 

Liverpool boss Jurgen Klopp-a'n match khelh tur an ngah tih hriain naupang rual leh player khel tam lo a luhtir a, Shrewsbury khelmuala an hlawhchhuah theih tawk erawh draw result a ni. 

Reds tan Curtis Jones-a'n goal hmahruai a khung hnuah Donald Love (own goal) chuan a chhunzawm ve leh a, awlsam taka chak tura ngaih an ni - mahse an fan-te ngeiin an auh el karah Jason Cummings a rawn lut a, penalty leh goal pangngai a rawn khung!

Liverpool tan Adrian chuan a dan nual a ngai a, bench aṭangin Mohamed Salah leh Roberto Firmino lutin danglamna an siam hman lo - 2-2 in inkhel a tawp a, March khian Anfield-ah replay khelh a ni ang. Klopp chuan, "Replay khelh hun tur hi Premier League lamin thlasik chawlh min pek lai a ni a, kan chawl ang. FA lamin kan chawlh neih min zahsak thei lo a, naupang hoin inelna an hmachhawn ang," a ti a, reserve team boss Neil Critchley chu Klopp aiawh tur a ni.