Chanmari FC-in coach an ban

Chanmari FC-in an elpui Aizawl FC laka an chak loh hnuah nimin tlai khan coach Victor Lalbiakmawia an ban a, Mizo Derby result nghawng a lian hle. MPL11-a Aizawl FC champion puitu Victor-a hian Chanmari hi Indian Football League-ah match nga chauh a enkawl a, point nga hmuin table-ah pasarihnaah awmin relegation playoff khel thei chinah an awm.

MPL12 champion Chanmari hian match nga hi RG Stadium, Mualpuiah vek an khel a, match li khelh hmabak hi khualmualah vek an khelh dawn avangin hmabak a harsa dawn hle. Mizo club hian team ṭha Sreenidi Deccan hial hneh mah se match hnuhnung pathumah chak an nei lo a, point kua hmuh theih aṭanga point khat chauh an hmuh avangin an result-ah an lungawi lo.

Dempo SC nen an inhmachhawn ṭumah inkhel thunun chungin Chanmariin ṭum hnih hma an hruai a, Goan club-in siphurh an sut ve ve avangin 2-2 in inkhel a tawp. Shillong Lajong an hmachhawn ṭumah pawh Chanmari hi chak thei tura ngaih ni mah se first half leh second half injury time-a goal an chhuah avangin 2-1 in an chak lo a, Aizawl FC lakah 2-0 a hmahruai an hruai hnuah 3-2 in an inlehthaltir.

Chanmariin insiamṭhat tumin coach Victor-a an ban a, a thlaktu tur an la puangzar lo. MPL11-a Chanmari champion puitu Rochhingpuia'n AFC A Licence a neih loh avangin head coach hna hi a chelh thei dawn lo a, Mizo coach bawk an la dawn a nih chuan Lalrozama Fanai buk a rit ber ang. Rozama hi Chhinga nen inṭhian ṭha tak a nih bakah Chanmari FC player hlui a ni. Chutihrualin inelna boruak a san tawh avangin tawnhriat ngah zawk an lak a rinawm a, Indian Football League an khelh theihna tura kaipuitu Dipankur Sharma hming pawh a ri tel.

Chanmarians hian inkhelh hmabakah Rajasthan United, Real Kashmir, Diamond Harbour leh Namdhari te an la hmachhawn dawn a, coach thar tan hmabak a harsa dawn. Chutihrualin Chanmariin inelna an la thutak tih a chiang a, thawhchhuah ngei an tum tih an thutlukna aṭangin a hriat theih.