Lawm avangin R-a a ṭap

Mizo Derby ropuina sawifiahtu chu inkhelh banah Aizawl FC coach R. Lalruatfela lawm avangin a ṭap. Kolasib tlangval R-a hian Aizawl FC a hmangaih a, Mizo Derby a ngai thutak a, a thawhrim bawk avangin Chanmari an hneh avanga a mittui tla hi a mak lo.

Aizawl FC coach R-a chuan, "MPL final kha a na em a ni. Kan record leh ropuina zawng zawng kha penalty pakhatin a ti chhe vek," tiin inkhelh bana a mittui tlak chhan Vanglaini a hrilh a, hnena an chan avanga a lawm thu a sawi tel bawk.

Chanmari nena an game plan chungchang sawiin R-a chuan, "Kan dawihzep angin a lang a, mah se tum mumal tak kan neih vang zawk a ni. Ball chang se, in pawt kak se ball kan chan vela chhut let (transition to attack) ah kan innghat. Ball chang tam turin min beisei dawn a, keini lamin ball chan tam kan tum lo a, kan khingpuite kan bum a ni. Engvang pawha chak kan tum a, ball chan tam a ngai lo, kan game kan sacrifice," a ti.

R-a chuan sawi chhunzawmin, "I League-ah minute 45 hi engmah a ni lo, season hmasaah hma kan hruai ngun a, min lehthal leh fo. Mizo player an nia chak emaw an inti dawn a, I League harsat zia an la hre lo," tiin halftime-a player-te a fuih dan Vanglaini a hrilh.

Set piece chungchang sawiin R-a chuan, "Ni hnih kan training-ah set piece ringawt minute 50 vel kan zir a, set piece aṭanga kan khung kha ka inring hrim hrim," tiin inbuatsaih ṭhat thu a sawi a, a tawpah an thawhrim rah an seng.