Liverpool tana danglamna thlentu Salah

June 22, 2017 khan Liverpool chuan AS Roma aṭangin Salah an la lut a, Reds ṭantu tam takin an club chanchina player ropui ber pawl ni tur an la lut tih reng an ngaihtuah phak lo.

Salah hi Liverpool hian pound maktaduai 36.5-in an la lut a, a khelh ṭhat dan a zira £43mtd-a sang chho tur a ni. A khelh dan kan hria a, Liverpool-in Salah an leina chu £43mtd tih hi a fuh zawk.

AS Roma forward hlui hian Liverpool tan a season hmasa berah match 52 khelin goal 44 tehmeuh a khung nghal a, pui tak a ni - Reds tan season khata goal 23 aia khung tlem a la nei ngai lo.

Salah hian Liverpool tan inelna hrang hrangah match 435 khelin goal 255 a khung a, assist 122 a nei thei. Season hmasa lawk pawh khan Reds tan inelna hrang hrangah match 52 khelin goal 34 a khung a, assist vawi 23 a nei.

Liverpool player zingah Salah hian Ian Rush (346) leh Roger Hunt (285) te chiah goal khung tam lamah a tluk lo a, kum kaw chhung leka a goal khung zat aṭanga teh chuan a ropui thlawt.

Merseyside club a pan hmaa FC Basel tana Swiss Super League vawi hnih a champion bak nomawi la chawi ngai lo Salah hian Reds tan nomawi chawi theih ang chu a chawi kim.

Premier League (2), FA Cup, League Cup, FA Community Shield, UEFA Champions League, UEFA Super Cup leh FIFA Club World Cup-ah te a champion pui a, UCL bikah hian final vawi thum a luhpui thei.