Khawi lamah nge Salah a kal dawn?

Mohamed Salah-a'n Liverpool-ah kum khat contract la nei mah se, a chhuak dawn a, club leh player inbiakremna a nih avangin 'free transfer' in Salah hi a chhuak dawn - a duh lam club pan turin zalenna a nei dawn tihna a ni.

Salah chhuah tur thu a chian rualin a club pan tur lam an inrinsiak nghal a, mahse, Salah agent Ramy Abbas Issa chuan, "Season tharah Salah hian khawi lam nge a pan dawn ka hre lo.

"Amah pawhin a la hre lo tihna a ni," a ti. Mahse, Salah chhuah tur thu a chian ruala mawng za nghal club hruaitu engemaw zat an awm ang tih a chiang a, a pan tur lam hi a chiang thuaiin a rinawm.

Kum 2023 khan Saudi Pro League club Al Ittihad chuan pound maktaduai 150-in Liverpool an dawr a, mahse, Reds hian Saudi club hi Salah chu zawrh lai a nih loh thu an lo hrilh.

Salah chhuah tur thu a chian takah chuan Saudi lam hi an rawn lan leh ngei a rinawm a, Arab ram laka Salah hralh tlakzia ngaihtuah phei chuan Saudi Pro League club tan Salah lakluh a châkawm dawn.

December thlaa Salah lungawi loh lai khan MLS commissioner Don Garber chuan, "Kut phar meuhin kan lo lawm ang," tiin Salah tan US lama kawng a inhawn thu a lo sawi tawh bawk.

Hetihlai hian Salah hian European football khelh a la duh thei a, Liverpool nena an inzawmna thlir chuan EPL club dang a zawm a rinawm chiah lo. Barcelona leh Real Madrid pawh an lam ri a, Serie A thlengin sawi rik a awm.

Hriat tel ngai erawh Salah hian hlawh tlem taka club zawm a duh dawn lo. Reds-in kar khatah £400,000 hlawhtirin, Liverpool player awm tawh zawng zawnga hlawh hnem ber a ni a, Serie A club tan chuan heti zat hlawhtir hi a zuamawm lo mai thei.

Hriat tel ngai chu Salah hian US-ah Egypt tan World Cup a khel dawn bawk a, season chawhnu lama a khelh dan leh World Cup-a a chet danin nipui transfer-a a hlutna a belhchhah viauin a rinawm.