MSL relegation battle a pui

Mizoram Super League season 11 relegation leh semifinal match khatna khelh a ni a, boruak a sang nghal hle.

Relegation game-ah Saron BC chuan 80-79 in Chhinga Veng BC an hneh a, semifinal match hmasa berah Khatla TBL chuan 82-66 in Mission Veng Hotshots an hneh bawk.

Saron an par

Match hmasa zawkah MSL 12 khel chhunzawm tur zawnna neih a ni a, relegation game ni mah se inkhel boruak a sang a, club pahnihte an ṭang hle.

League round-a beisei pha lo Chhinga Veng BC an khel ṭha nghal a, second quarter thlengin point 10-in hma an hruai.

Mahse Saron an beidawng duh lo a, third quarter leh fourth quarter-ah an score hnem zawk a, a tawpah an dingchang zawk.

Fourth quarter-ah hian Rookie of the Year ni lai, Lalmalsawma'n point kua score-in a ṭangkai a, captain T. Lalhriatzela leh Ramdinfela ten Mala hi an thlawp ṭha bawk. Saron BC-in MSL-a inhamtan an tum hle.

Chak lo mah se Chhinga Veng BC an khel ṭha a, an foreigner King Revolution-a'n point 24 neiin rebound vawi 13 a la bawk.

An ram pawn player hi Lalhriatzuala (16), Dennis Lalmuanpuia ten thlawp ṭha mah se an vanduai zan an tawng a, point khat lekin an chak lo.

Chhinga Veng BC hi beisei aia ṭhaa an khelh chhuah avangin inrintawkna nasa tak an neih a rinawm a, game 2-ah chak ngei an tum tawh ang.

Hello Title no.4

Inkhel hnuhnung zawkah Khatla TBL-in Hotshots hneh turin harsatna an tawk lo a, a vawi li nana champion turin kawng dik an zawh mek.

TBL tan Makhel Ahkim Mitchell-a'n point 21 score-in rebound vawi 12 a la a, player of the match-ah thlan a ni.

Mitchell hi captain Vanlalṭhazuala leh Emanuel VL Awmpuia ten an thlawp ṭha a, nuamsa takin hnehna an chang.

Hotshots tan dan pangngaiin Darnell Johnson a khel ṭha lehpek a, inter state player Japjit Singh Gill-a'n a thlawp ṭha bawk. Mahse Hotshot-in TBL an ngam lo a, point 16 zetin an in thlau. Game 2-ah an insiamṭha lo a nih chuan an tan final luh beiseina a tawp nghal dawn.