Zarkawt leh Zemabawk intawng leh dawn

Mizoram Super League champion ngun ber, Zarkawt BCA chuan vawi khat nana champion tum Zemabawk BC an hmachhawn leh dawn a, club pahnihte hian zanin dar 8:30-ah semifinal-a an game khatna an khel dawn.

Champion lai

Tun season-ah dan pangngaiin BCA an che ṭha a, an chhuanvawr Lalrina Renthlei khel lo mah se harsatna an tawk lo a, league round-ah vawi khat chiah an chak lo.

BCA hian Mizo player - Zonunsanga, Lalnunpuia Renthlei, Matthew Remtluanga Sailo te an kawl a, anni hi tualchhung player-ah chuan a ṭha berte an ni.

Ram dang player Caio Domingos Oliveira leh Arvinder Singh te an kawl bawk a, MSL 11 champion turin an ṭha tawk.

Zarkawt BCA coach K. Vanlalruata chuan,"Player te an dan kim a, kan inpuahchah nasa hle. Mahse Zemabawk BC an ṭha a, kan hneh tawh avanga zuam ngawt chi an ni lo. Fimkhur leh inringtawk takin kan khel ang," tiin Vanglaini a hrilh.

Zemaballers

Hetihlai hian Zemabawk BC an duai bik lo a, league round match hmasa pathumah chak lo mah se, an match hnuhnung paliah hnehna an chan avangin semifinal an lut.

Inter state player Pratyanshu Tomar-a'n a teammate te phurna nasa tak a pe a, a awm hnuah Zemabawk BC-in an ṭhatpui hle a, zaninah pawh an innghahna tur a ni.

ZBBC hian Mizo player langsar K. Lalthianghlima, Lallianmawia leh Lalropuia te an kawl bawk a, Zarkawt BCA laka hnehna chang turin theihna sang tak an nei.

Zemabawk BC coach Liansangpuia chuan,"BCA hi chu club lian an ni a, huphurh loh ngawt chi an ni lo. Mahse kan inpuahchahna a ṭha a, kan khingpuite chak lohna lai kan zawn nasa. Player te an fit bawk a, chak ngei kan tum a, kan phur tawh hle," tiin Vanglaini a hrilh.