Ngaihven hlawh Japanese Grand Prix

Formula 1, 2026 season kal mekah March 29, Pathianni hian Japanese Grand Prix ṭan a ni leh dawn a, Suzuka Circuit-ah neih a ni dawn.

Japan-a racing tana tui mite hi an dangdai bik hle a, Ningani, team-ten intlansiak atana inbuatsaihna an neih lai aṭangin mipui sang tam takin a hmunah enin, ṭhutna a khat tawh ṭhin a ni.

Hei bakah hian thuziak leh cheimawina chi hrang hrang, mahni kuta siam chawp mawi leh dangdai tak tak hmuh tur a awm ṭhin a, hei hi an larna chhan pakhat a ni bawk.

Inelna an neina hmun tur Suzuka Circuit hi lian leh hmingthang tak a ni a, a hmun ṭhenkhat hi a zim deuhin, chak taka tlan kualna (high-speed corners) leh tlan kual zung zungna hmun a tam hle a, a track kal hmang (flow) hi driver te track duh ber thlannaah pawh a lang sar pawl a ni ziah thin.

Driver te bakah team hrang hrangte tan Japanese GP hi inelna hautak leh fiahna a ni. Australian leh Chinese Grand Prix-ah Mercedes an che ṭha a, an driver pahnih George Russell leh Kimi Antonelli te an chak. Japanese GP-ah driver dang an ṭang sawt ang.

Chinese GP, March 15 Pathiannia neih zawh takah Mercedes driver te tho an langsar a, anni bakah hian Ferrari friver Lewis Hamilton a che ṭha a, Ferrarri-a a inleh hnuah a thlen san ber ṭum a tawng a, pathumna a ni.

Vawi sarih lo champion tawh Hamilton chuan, "Ka ṭhat dan berin ka rawn let niin ka hria a, rilru leh taksa lamah pawh ka harh ṭha hle a, hmasawn zel turin ka inpeih. Hei aia ṭha hian ka la rawn kir leh dawn chauh," a ti a, a aia sang thlen a la tum a, Japanese GP-ah mipui mit fukna tur pakhat a ni.

Melbourne-ah Oscar Piastri a tlan chhuak thei lo a, China-ah phei chuan an driver pahnihin an tlan thei lo. McLaren hian team dang nen khaikhinin thil zir chianna an neih tlem phah a, an motor leh engine chak dan ber vawrh chhuah dan tur chungchangah McLaren hi an elpui dangte lakah an hnufual a, Japan-ah insiamṭhat an tum ang.