Thla khat chawl tur Eze

Arsenal midfielder Eberechi Eze chu a inhliam avangin a chawlh rih a ngai dawn a, a chawlh chen tur la chiang lo mah se thla khat chhung chu a inkhel thei dawn lo.

Kum 27 mi Eze hian kar hmasa UCL last 16-a Bayer Leverkusen nen an hneh ṭumah hliam a tuar a, Pathiannia Carabao Cup-a Manchester City nen final an khelh ṭumah a inlan tawh loh bakah, England squad aṭangin a inhnukdawk.

Gunners coach Mikel Arteta chuan, "Eze hliam hi tun karah endik a ni dawn a, result kan hriat hunah engtianga rei nge a chawlh dawn a hriat chiah ang," a ti. Eze hian England-in Netherlands leh Switzerland te a hmachhawn hunah a inlan thei dawn lo.

Crystal Palace midfielder hlui hi awm lo mah se captain Martin Odegaard a dam leh tawh a, Norwegian midfielder hi damkawr ni mah se ani aia thlan tur an awm bik lo.

London club hi inelna pathum - FA Cup, Premier League leh Cha,mpions League-ah te champion an la inbeisei a, treble champion nih an tum a nih chuan squad chhah a ngai a, Eze aiah Odegaard awm tho mah se an dam kim a pawimawh dawn.