Brazil leh France inlan zan

Football khawvela hlawhtling ber pawl pahnih Brazil leh France te chu zanin dar 1:30-ah an inhmachhawn dawn a, hei hi FIFA World Cup lo thleng tur atana an inbuatsaihna a ni. He inkhel hi friendly match ni mah se ram lian pahnih an nih avangin ngahven a hlawh a, Carlo Ancelotti leh a hote tan inelna tak tak an hmachhawn hmaa fiahna lian tak a ni ang.

Tun hnai chhoah Brazil hi an che ṭha lo a, mahse Brazil mipuiten Italian coach Ancelotti-a'n danglamna a thlen an beisei hle. Ancelotti hian tun international break-ah Neymar a ko tel lo a, chanchinbu ṭhenkhat chuan World Cup-ah pawh a tel dawn lo niin an tarlang hial bawk.

Ancelotti hian player ṭhenkhat fiahna hun atan leh enchhin nan hman a tum a, inelna pangngai ni lo mah se inkhel hmuhnawm tak kan hmuh a rinawm.

Brazil tan Vinicius Junior chu an innghahna a ni leh dawn a, Real Madrid forward hian season bul a ṭan ṭha lo a, hun rei tak chhung goal thun thei lo. Mahse, tunah chuan a khel ṭha leh tawh a, tun season-ah hian match 42 khel tawhin goal 17 a thun tawh a, assist 10 a nei tawh bawk. Eng team tlarhnung tan pawh ven châkawm loh a ni.

Vini bakah Raphinha a awm dawn bawk a, Barcelona leh Real Madrid forward te hian France tlarhnung sut hawn an tum dawn.

Team lehlamah France-in khawvela squad tha ber pawl an nei a, player neih ṭhat avanga ram dang huphurh rawn hi kuminah pawh World Cup-a champion tura rinkai ber pawl an ni.

Didier Deschamps-a'n France hi hun rei tak a enkawl tawh a, player-te pawhin a khelh dan phung an bel tawh a, Brazil lakah chak ngei an tum ang. France hian World Cup inbuatsaihna atan hian Brazil leh Colombia te an hmachhawn dawn.

France tan Michael Olise chu an hmachhuan a ni dawn a, Olise hi tun season-ah Bayern Munich tan a vul a, Harry Kane leh Luis Diaz te nen inkawpin, khawvel tlar hma hlauhawm ber pawl an ni. Brazil lakah pawh a thiam thil lantir a tum leh dawn ang.

Deschamps-a'n Kylian Mbappe a ko tel a, mahse Mbappe hi dam kawr a ni a, Real tan an match hnuhnung berah bench aṭangin a lut. Brazil lakah a inlan a nih pawhin bench aṭang bawkin a luh a rinawm.

Ram pahnihte hi an inhmachhawn hnuhnung ber chu kum 2015 daih tawh kha a ni a, friendly match tho niin 3-1 in Brazil an chak. Kum 11 hnuah an intawng leh dawn.