Rosenior thlak thei zingah Fabregas

Chelsea chuan an manager Liam Rosenior thlak turin an player hlui Cesc Fabregas an duh a, Chelsea hotuten Fabregas hi an thlithlai mek niin khawthlang chanchinbuten an sawi.

Rosenior hi January khan an lalut chauh a, a enkawl tirhin a a che ṭha nghal a, Blues-in hma an sawn. Mahse thla hnih a ral leh meuh chuan Chelsea ṭantute bakah hotuten an duhkhawp lo a, chhuah tir mai an hreh lo nia sawi a tam hle.

Kum 41 mi Rosenior hian 2032 daih contract a nei a, Chelsea-in an chhuah dawn a nih chuan pawisa tam tham tak an chawi a ngai dawn. Mahse Rosenior hi a result a chhe chhunzawm zel a nih chuan London club hotute an ngawi reng lo ang.

Chutihrualin, Chelsea thuneituten Rosenior hi Champions League an khel phak lo a nih pawhin a chungah rinna an nghat dawn nia sawi a awm bawk.

Hetihlai hian Fabregas-a'n Como a chet ṭhatpui a, Italian club hi kum hnih a enkawl chhungin Serie A-ah a hlan kai bakah, season thara Champions League khelh beisei ngamin a chet ṭhatpui mek. Player naupang enkawl a thiam bawk avangin a club hluiin an duh niin a lang.

Kum 38 mi Fabregas duhtu zingah Manchester City hming a ri tel a, Pep Guardiola-an kumin nipuiah Etihad Stadium a chhuahsan chuan, a thlaktu atana Spanish midfielder hlui hi an duh.

Tun season atan Premier League-ah match khelh tur a tam tawh lo a, Chelsea thuneituten chhan mah se Champions League an khel phak lo a nih chuan Rosenior dinhmun a derthawng dawn. City-in Fabregas an beisei ve bawk avangin nipui transfer a ngaihnawm dawn.