Nuggets tan Jokic a vul zel

Denver Nuggets center Nikola Jokic a che ṭha zel a, nimin zing khan Nuggets-in 125-123 in Phoenix Suns an hneh a, Jokic hian triple double siam lehin match zawna a siamna a ni. March 23, Thawhṭannia Portland Trail Blazers an hneh ṭum khan triple double a siam tawh bawk.

PHX Arena-a inkhelah team pahnihte an inhnetawk a, second quarter-ah point inthlau deuh mah se hun tawp dawn lamah an inhnaih hle a, second 11 chauh a awm tawh tihah Jokic-a'n mid range aṭangin a score a, a team hma a hruaipui.

Suns-in timeout la nghalin lehthal tum mah se, in bound-ah an chesual deuh a, Devin Booker-a'n three point shoot mah se a lut lo hlauh a, point hnihin Nuggets an chak.

Nuggets tan Jokic-a'n point 23 neiin, rebound leh assist 17 ve ve a nei a, a team tan a thawh hlawk hle. Serbian center hi a dam ṭhat chuan khawvela player hlauhawm ber zinga mi a ni.

Jokic hian a career-ah triple double vawi 192 a siamna niin, triple double siam hnem lamah Russel Westbrook chiah a tluk lo a, Westbrook hian 209 a nei. Jokic hi kum 31 chauh a la ni a, inhliam loa a inkhelh zel chuan Westbrook-a record hi a khum theih a rinawm.

Tun season-ah Nuggets hi hliamin a tlakbuak a, Jokic bakah Aaron Gordon leh Jamal Murray te inhliam vangin an buai hman. Mahse Nuggets an insiamṭha a, la dam kim lo mah se Jokic-a hoin hma lam an pan zel. Nuggets hi Western Conference-ah palinaah an awm a, match kua khelh tur an la nei a, playoff khel turin an dinhmun a ṭha hle.