US lamah Griezmann a pem dawn

Atletico Madrid forward Antoine Griezmann chuan Major League Soccer club Orlando City a zawm dawn a, season tawp rualin Spanish club hi a chhuahsan tawh dawn.

Kum 35 mi Griezmann chuan, "Ka career bung thar ka kai tur hian min tiphur hle. Club nen kan inbiak tirh aṭang khan, an tum sanzia leh hmachhawp an neih ṭhatzia ka hmu thiam nghal a, kha khan min hneh hle.

"Ka in thar atana Orlando hman hlan ka nghakhlel hle a ni," a ti a, Atletico a chhuahsan huna USA lama a pem tur chu a phur thu a sawi.

Kum 35 mi Griezmann hian Real Sociedad aṭanga a professional career zawh ṭanin, Atletico tan hian 2014 - 2019 inkar khan a lo khel tawh a, match 257-ah goal 133 khungsakin, Barcelona lam a pan.

Catalan club-ah hian beisei angin a khel lo a, match 102-ah goal 35 chiah khungin, season hnih hnuah Atletico-ah loan-in a kir a, kum 2022-ah a nghetin Atletico hian an la lut zui.

Griezmann hian tun season inelna hrang hrangah match 43 khel tawhin, goal 13 ngawt a khungsak a, assist vawi li a nei tel. Griezmann hian France tan World Cup nomawi hial chawi mah se, club lamah chuan Atletico leh Barca tan a khel chungin league nomawi a chawi miah lo!

Atletico hi Supercopa de Espana, Europa League leh UEFA Super Cup a lakpui a, kum 2016 khan Champions League final a hruai thleng bawk. Barca hi kum 2021 khan Copa del Rey a champion pui thung.

Griezmann chuan Atletico chu a theihnghilh ngai loh tur thu sawiin, "He club hi ka chhungkua leh ka in in ni a, tuna ka awm dan hi thua sawifiah pawh ka thiam lo hial a ni.

"Zinkawng hlimawm tak kan zawh ho a, hriatreng tlak match tam tak hmachhawn hoin, goal leh hlimna tam tak kan tawng ho. Khang kan hlimnate kha, Atleti mi leh sa lo tan chuan sawifiah theih a ni lo," a ti.

Mahse, Griezmann chuan tun atan chuan season-a an la bak thlir phawt a ṭul thu sawiin, French forward chuan, "Tun atan chuan kan hmaa thil lo thleng tur chu i dah ṭha phawt ang - ka chhuak nghal dawn hleinem!

"He club jersey ha zel tur hian thla engemaw zat ka la nei a, kan khelmual leh khualmualah ka theihna zawng zawng hlan turin hun ka la nei e. Copa del Rey nomawi chawi tur leh, Champions League-a a sang thei ang ber thleng turin theihtawp chhuah zel ang," a ti a, champion nomawi nena Atletico thlah a duh.