Inter Miami leh LA Galaxy ten Casemiro an duh

Major League Soccer club Inter Miami leh LA Galaxy te chuan Manchester United midfielder Casemiro an duh a, season tawp ruala Old Trafford chhuahsan tur midfielder hi US lamah a pem hmel hle.

Kum 34 mi Casemiro hian season tawp rualin United-a a contract a hmang zo tawh dawn a, January khan Old Trafford a chhuahsan tur thu a tichiang. Tun hnaiah a khelh ṭhat avangin United fan-ten chelh la duh mah se, a chhuak ngei dawn niin a lang.

Real Madrid-a hming chher tak Casemiro hian kum 2022 khan Manchester United hi pound maktaduai 60-in a zawm a, kum 2023 khan League Cup-ah champion puiin, kum 2024-ah FA Cup-ah an champion bawk.

United a pan hnuah inelna hrang hrangah match 336 khelin goal 24 a khung a, assist vawi 14 a nei. Real-ah khan match 336 khel hmanin, goal 31 a khung bakah assist vawi 29 a nei.

Nomawi nena khaikhina ralah chuan Real-ah a hlawhtling hle a, Spanish club tan hian Champions League nomawi ringawt pawh panga a chawi hman. Hei bakah hian La Liga (3), Copa del Rey (1), Supercopa de Espana (3), UEFA Super Cup (3) leh FIFA Club World Cup (3) ah te a champion hman bawk.

Tun season-ah Casemiro hian United tan match 30 khelin, goal sarih ngawt a khung tawh a, assist vawi hnih a nei bawk. United-ah hian kum khat dang contract pawhsei theihna dan la nei mah se, pawhsei loh a tum a ni.

Casemiro duhtu zinga mi Inter Miami hi Lionel Messi khelhna niin, season hmasa MLS champion an ni a, Brazilian midfielder tan zawm an châkawm mai thei. Hetihrual hian LA Galaxy pawh David Beckham, Steven Gerrard leh Zlatan Ibrahimovic te lo khelh tawhna an ni a, US club lar ber pawl an ni a, pan an châkawm tho ang.