Bengaluru-in Pep Munoz an la lut

Indian Super League club Bengaluru chuan Spanish coach Pep Munoz chu an coach turin an la lut a, UEFA Pro Licence neitu coach hian manager lailawk Renedy Singh a thlak.

Bengaluru hi Super Cup group stage aṭanga an tlak khan coach Gerard Zaragoza chuan a chhuahsan a, Bengaluru chuan coach lailawk atan Renedy Singh an ruat zui.

India international hlui hian hna a thawk chhe hran lo a, ISL khelh mekah Bengaluru hi match ruk kaihruai hmanin, vawi thum an chak a, vawi hnih draw neiin, vawi khat an tlawm.

Bengaluru hian point 11 nei mekin, hmahruaitu Mumbai City chu point thum chiahin an phak lo a, mahse, club thuneitu lamin coach nghet neih an duh a, Munoz an la lut ta.

Munoz hian Barcelona youth team lamah assitant coach hna a lo thawk tawh ṭhin a, Cambodia Premier League club Svay Rienga pawh enkawl tawhin, league nomawi vawi hnih a chawipui bakah Cambodian Cup-ah a champion pui bawk.

Hetihrual hian a club enkawl hnuhnung ber erawh Chinese Super League club Shenzhen Peng City FC niin, result a nei ropui lo. Match 10 chiah kaihruai hmanin, vawi hnih a chakpui a, inhriatthiam tawnnain an inṭhen.

Munoz hian Bengaluru-ah a hming chher thar leh a tum dawn a ni ber - CSL lamah Shandong Taishan leh Qingdao Hainiu-ah assistant coach a ni tawh a, China national team-ah assistant coach thoin a awm tawh bawk.