National Masters Championship Mizo shuttler-te an hlawhtling

Yonex-Sunrise 48th Indian Masters (Veteran) National Badminton Championship 2026 chu March 25, Nilaini khan khelh zawh a ni ta a, Mizoram aṭanga inlan zingah shuttler paliten medal an hlawh chhuak.

Kum upa lam tana inelna Masters Championship-ah hian K. Ramzauva chuan 60+ Men's singles-ah silver medal lain, medal la hmasa ber a ni a, a hnuah F. Vanlalhriatpuii, Lalduhzuali leh Samuel Lalnunmawia ten medal an hlawh chhuak ve leh bawk.

Hello Hriati

F. Vanlalhriatpuii'n category hnihah medal a la - a vanglaia Mizo hmeichhe top player ṭhin hian 35+ women's singles-ah bronze medal lain, mixed doubles-ah silver a la bawk.

Saron veng nula Hriati hian 35+ women's singles-ah round of 64 aṭangin bul a ṭan a, seeded no.2 hial vaw tlain, quarterfinal thleng turin straight set vekin a chak!

Hriati hian quarterfinal-ah pawh Amruta Agashe chu 21-14, 12-21, 21-11 in a hneh a, semifinal-ah erawh seeded no. 3 Noopur Barve chu 14-21, 21-17, 14-21 in a ngam lo a, bronze-ah lungawi a zir.

Mixed lamah...

Hriati hian Samuel Lalnunmawia nen inkawpin, 35+ mixed doubles an khel bawk a, quarterfinal-ah seeded no. 2 Subramanian S. leh Nirthya Ranjan te inkawp chu 21-17, 21-12 in an hneh hial.

Semifinal-ah Satinder Malik leh Noopur Barve te lakah 18-21, 21-19, 21-7 in an chak leh a, mahse, final-ah seeded no. 1 Mohamed Renhan R. leh Anees Kowser J. te inkawp chu 13-21, 18-21 in ngam lo - silver an dawng.

National Championship Sub-Junior level-a Mizo zinga champion thei hmasa ber Samuel hian 35+ Men's doubles-ah Zarzokima nen ṭangdunin quarterfinal an lut bawk a, Zarzokima hi 40+ Men's Singles quarterfinal-ah a vanduai tel bawk.

A hming Duhzuali

Durtlang chhuanvawr Lalduhzuali'n medal pahnih a hawn - 40+ women's singles-ah inelna hmachhawnin, quarterfinal-ah seeded no. 7 Priya Prakash chu 21-13, 21-13 in a hneh a, a phur hle. Mahse, semifinal-ah Sandhya M. chu 19-21, 14-21 a ngam loin a vanduai zawkah a ṭang a, bronze zawk a hlawh.

Duhzuali hian 40+ Women's doubles-ah Nagaland mi Prathana Thapa ṭanpuiin, silver a la bawk. Quarterfinal-ah seeded no 1, Diva Arora leh Aditi Rode-te inkawp chu 21-16, 21-10 in an hneh a, semifinal-ah pawh seeded no 4, Shilpa Ghanti leh Smarika Manhas te ṭangdun chu 21-8, 18-21, 21-11 in an hneh.

Final-ah erawh Radhika Madhur Ingalhalikar leh Sandhya M. te lakah 18-21, 13-21 in, uiawm takin an tlawm a, silver an lo hawn.