Tuchel-a England inlan zan

Thomas Tuchel-a enkawl England chu zaninah an inkhel dawn a, dar 1:15-ah Uruguay nen an inhmachhawn dawn. Friendly match ni mah se England national team hi mipuiin an ngaihven a, World Cup atana inpuahchahna a nih bawk avangin inkhel hmuhnawm a beisei ngam.

Inlan turte

England tan Dean Henderson, Dan Burn, Marc Guehi, Ezri Konsa, Nico O'Reilly, Elliot Anderson, Declan Rice, Morgan Rogers, Anthony Gordon, Harry Kane leh Bukayo Saka te chu coach Tuchel-a'n hahdamna hun a siamsak avangin an inlan dawn lo a, March 31 Thawhlehni zana Japan an tum hunah squad an zawm ang.

Harry Maguire leh John Stones-te chu tlarhnung laia inkawp tura rin an ni a, midfield-ah Kobbie Mainoo leh Adam Wharton-te an awm bawk.

Midfield hma lamah inhliam hnua lo let Jude Bellingham chu khel leh thei tawh tura ngaih a ni a; Cole Palmer, Marcus Rashford leh Jarrod Bowen-te pawh inkhel tlar hma lama bul ṭan tura rin an ni bawk.

Jarell Quansah leh Eberechi Eze-te an inhnukdawk thung a, an aiah Ben White leh Harvey Barnes-te chuan an ai an rawn awh dawn. Uruguay tan Luis Suarez leh Edinson Cavani-te chawl tawh mah se, hming langsar an la tam a, Barcelona defender Ronald Araujo leh Real Madrid midfielder Federico Valverde-te chu an innghahna tur a ni.

Anni bakah hian Manchester United midfielder Manuel Ugarte a awm bawk a, tun season-ah United tan khelhna hmun chang lo mah se bul a ṭan a rinawm. Tlarhma lamah Darwin Nunez a awm dawn a, Liverpool forward hlui hi an innghahna a ni dawn. Nunez hian ram tan vawi 36 a inlan tawhah goal 13 a thun tawh a, England laka Uruguay chakpui turin theihna a nei.

Thlirlawkna

Kumin World Cup lo awm turah England lakah beiseina a sang a, semifinal tal an thleng pha lo a nih chuan English mipuite an thinrim khawp ang. Tun nipui hian trophy hlu tak hi chawi ngei an tum ang.

World Cup qualification-ah England hi an che ṭha a, match riat an khelhah chak vekin goal 22 an thun a, goal an chhuah lo bawk. Point 24 hmuin an group-ah pakhatna an ni a, an match hnuhnung parukah pawh an chak vek.

Three Lions hian nikum October khan friendly match hnuhnung ber an khel a, 3-0 in Wales an hneh. Hemi hnu hian Latvia, Serbia, leh Albania te hneh zuiin World Cup qualifying round ṭha takin an khar. England hian Uruguay bakah Japan, New Zealand, leh Costa Rica te friendly match-ah an hmachhawn dawn.

Uruguay pawh World Cup khel turin an tling tawh a, South Ameriica qualification-ah palina niin Argentina, Ecuador, leh Colombia-te chiah an chungah an awm. Marcelo Bielsa-a hote hi tun nipui tournament-ah champion tura rinkai ni lo mah se zuam chi an ni lo.

Uruguay hian World Cup hi vawi hnih (1930 leh 1950) an lo chawi tawh a, 2010 khan palina an ni a, 2018-ah khan quarterfinal an thleng bawk. Mahse, 2022-ah erawh kha chuan group stage-ah an tla thung.

World Cup vawi hnih champion tawh Uruguay hian friendly match an khelh hnuhnung paliah vawi hnih hnehna an chang a, vawi khat an inhnehtawkin an match hnuhnung ber November 2025-ah khan USA lakah 5-1 in an tlawm.

England leh Uruguay hi vawi 11 an lo inhmachhawn tawh a, Uruguay hian vawi nga hnehna changin England-in vawi thum an chang thung a ni. An inhmachhawn hnuhnung ber 2014 World Cup-ah khan Uruguay hi 2-1 in an chak. Kum 12 a liam leh meuh chuan thil a danglam tawh a, chak turin Uruguay-in theihtawp an chhuah a ngai dawn.