Hnehna chan kan duh - Leclerc

Charles Leclerc chuan Pathiannia neih tur Japanese Grand Prix-ah Ferrari-in Mercedes an hmachhawn dan tur chungchang a sawi chhuak a, Leclerc chuan kum 2026-a inelna hrang hrangah hnehna chan tumin, an team-in upgrade thar siam chhuak turin theihtawp an chhuah tih a sawi bawk.

Ferrari hian kum bul an ṭan fuh thawkhat a, rules thar hnuah hmasawnna nasa tak neiin, Albert Park leh Shanghai-a inelna hmasa ber pahnihah khan Leclerc leh Lewis Hamilton-te kaltlangin podium-ah vawi hnih an ding tawh a ni.

Chutihrualin, Mercedes nena an inkar tihzim an la tum hle a, lap khatnaah Ferrari hian Silver Arrows (Mercedes) an la tluk lo deuh a, tun thlengin qualifying-ah hmahruaitu dinhmun an la hauh thei rih lo.

Leclerc chuan,"Mite rin ai hian kan inkar hi a la hlain ka hria. Tlan hmasate thlir khan, lirthei inum kual leh inbeihna nasa tak kan hmu a, chu chu a hmuhnawm hle. Mahse, lirthei tharah hian vawi khat lek chetsual pawhin hun tam tak kan hloh phah thei a ni.

An hnaiha kan awm ve reng theihna kawng awmchhun chu a tlan ṭantirha lo tihbuai ve hram hram a ni a, mahse an hmaa tlan an awm loh veleh, lap tawp berah khan an chakzia an lantir leh nghal tih kan hmu ang.

Kan tlan hmasak pahnihah khan second chanve velin kan la tlak hniam hmel a, hei hi chu thil namai lo tak a ni a, mahse ka hnual phah chuang lo,” tiin a sawi.

Grand Prix hrang hrangah Ferrari hian hmahruaitute an elpha tih an lantir tawh a, Leclerc leh Hamilton-te pawhin George Russell leh Kimi Antonelli te lakah hma an lo hruai hman tawh.

Hemi avang hian inbeihna hmuhnawm tak tak a thleng tawh bawk a, mahse Leclerc chuan Ferrari hian hmasawnna an neih belh zel a duh thu a sawi a, hmasawnna an neih chuan Championship-a hnehna chang tura inbeihnaah hian an la tel ve reng thei dawn.

Ferrari driver Leclerc chuan sawi belhin,"Tunah rih chuan kan dinhmun hi a chhe hran lo, mahse podium-a din ringawt hi kan tum ber a ni lo. Hnehna chan kan duh.

Mahse Mercedes hi an san tak em avangin tun dinhmunah chuan a harsa rih. Kan thawk rim hle a, a bik takin factory-a thawktute phei chu lirthei tihchakna rawn siam chhuak thuai turin theih tawp an chhuah.

Upgrade thar a awm nual dawn a, mahse chu chuan danglamna a rawn thlen dawn em tih erawh ka hre lo. Team dangte pawh an awm mai mai bik lo tih ka chian avangin inbeihna hi a la harsa dawn hle a ni." a ti bawk.