A vawi khat nana ram aiawh tur Karl

Bayern Munich forward Lennart Karl chu a vawi khat nan Germany-in an ko a, zanin dar 1:15-ah hian Switzerland nen an inhmachhawn dawn.

Kum 18 mi Karl hi tun season-a player hmuhnawm ber pawl a ni a, Club World Cup-a a inlan hnuah first team tan a inlan ṭan a, a rintlak nghal hle a, Germany coach Julian Nagelsmann-a'n Bayern rawlthar hi tun kar tir lam khan a ko nghal.

Lennart Karl hi player dang aiin a dinhmun a danglam deuh a, Nagelsmann-a'n phone-a a biak hmasak ber khan Karl hian mathematics class a kal lai a nih avangin a chhang hman lo.

Karl chuan,"Maths class ka awm lai a ni a, Nagelsmann-a'n min rawn phone a, a tirah chuan ka chhang lo. Mahse minute nga hnuah ka call back leh a, National team-ah min ko ve tih ka hriat khan ka hlim hle a ni.

Keimah leh keimahah pressure engmah ka insiam lo a. Ka theihtawp ka chhuah dawn a, World Cup-ah pawh ka tel ve thei ngei ke beisei," tiin a sawi.

Switzerland leh Ghana lakah Karl hian bul ṭan lo mah se, bench aṭanga danglamna siam turin Nagelsmann-a'n a luhtir ang.

Kum bithliah inelnaah Karl hian ram tan a lo khel tawh a, tun hi senior team tan a vawi khat khelhna tur a ni. Friendly match chauh ni mah se Karl tan a pawimawh dawn a, World Cup inbuatsaihna a nih tel avangin a chet ṭhat a pawimawh dawn a, coach te mit a tlung a, a dam ṭha a nih chuan World Cup khel turin an koh leh ngei a rinawm.