Celtics lakah Thunder ri a zawi

NBA regular season khelh mekah nimin zing khan Boston Celtics chuan 119-109 in Oklahoma City Thunder an hneh a, playoff khel pha turin kawng dik an zawh zel.

TD Garden, Boston-a inkhelah Celtics tan Jaylen Brown-a'n point 31 neiin a score hnem ber a, Brown hi Jayson Tatum (19), Payton Pritchard (14) leh Neemias Queta (13) ten an thlawp ṭha a, Celtics chak nan an thawhhlawk hle.

Thunder tan MVP ni lai Shai Gilgeous-Alexander chuan point 33 neiin a score hnem ber a, mahse SGA hian a ṭhiante puihna dawng ṭha tawk lo a, Chet Holmgren (10) leh Luguentz Dort (14) te chiah point 10 score tling an awm.

Celtics hi Eastern Conference-ah pahnihnaah an awm mek a, Detroit Pistons chiah an tluk lo. Match 10 chiah khelh tur a awm tawh a, Celtics hian playoff la lut chiang lo mah se an khelh a rinawm tawh zawk.

Thu lawmawm Celtics tan a awm a, an thiampuipa Jayson Tatum a dam ṭha leh tawh a, a khel ṭha nghal viau. Tatum hi nikum May khan a inhliam avangin a chawl vang vang a, March 6 khan a lo kir leh chauh. Tatum hi ni 298 zet a chawl a, tun season-a Celtics game 62-ah a khel ve lo.

Hetihlai hian OKC erawh playoff khel tura tling hmasa ber an ni a, Western Conference-ah pakhatna an ni. Playoff khel turin tling tawh mah se OKC tan an result hi a lawmawm loh a, Celtics laka an chak danah zir tur an ngah.