Ngaihven hlawh Morocco hmaah Ecuador

African football-a ram lian Morocco chu zanin dar 1:45-ah Ecuador nen an inkhel dawn a, friendly match ni mah se tun hnaia Morocco boruak avangin mipuiin an ngaihven dawn.

January 19 khan African Cup of Nations-ah Morocco hian 1-0 in Senegal an hneh lo a, final boruak sanga Brahim Diaz-a'n panenka hmangin penalty a hlah a, an chak lo zawkah an ṭan avangin sawi zui a hlawh.

Penalty an chawi danah Senegal player te an lungawi lo a, ground an chhuahsan. Captain Sadio Mane-a'n a koh hnuah an lut leh a, extra time-a Pape Gueye-a goal hmangin a vawi hnih nan AFCON an champion.

Mahse thla hnih liam hnuah Senegal hremna a chhuak a, AFCON dan article 82-a a inziah angin, player ten an khel duh tawh lo emaw, referee phalna loa hun tawp hmaa khelmual an chhuahsan a nih chuan chak lo ang a ngaih an ni a, inelna aṭanga paih tur an ni bawk.

Article 84-in eng team pawhin article 82 an bawhchhia a nih chuan 3-0 a chak loah puan tur an ni, a tih bawk avangin Senegal hi chak lo zawkah an puang hnuhnawh a, 3-0 in Morocco chak zawkah an puang. Senegal an ngawi mai mai bik lo a, Court of Arbitration for Sport (CAS)-ah an khing dawn.

Hetiang boruak a awm hnua Morocco match hmasa ber tur a ni a, friendly ni mah se boruak a san a rinawm a, Morocco player ten auh el an tawk a nih pawhin a mak lo ang.

Morocco squad hi AFCON squad nen a danglam tam lo a, player langsar an kawl hnem bakah World Cup hnuhnung bera semi final thleng thei an nih avangin Morocco rinkai an ni a, Achraf Hakimi leh Brahim Diaz-a hoin pawn lam boruak inhnehtir loh an tum dawn.

Ecuador-in player langsar an kawl hnem lo a, mahse South America ram hi Europe ram nen an inkhelhin an danglam ṭhin a, zaninah Moises Caicedo hoin Morocco an hlau dawn bik lo.