Khelo India Tribal Games (KITG) Silvan-a tan Gold; Laithanpuia tan Silver

Khelo India Tribal Games (KITG) weightlifting-ah Mizo an che ṭha zel. Isak Malsawmtluanga'n 60 kg inelnaah gold a lak hnuin Sairang tlangval Laithanpuia'n 65 kg-ah silver medal a rawn hlawh chhuak a, nimin khan 71 kg-ah Siaha tlangval Silvan Beihrothatlo-a'n gold a rawn chawi chhuak leh bawk.

Siaha tlangval Gold

71 kg inelnaah Silvan Beihrothatlo leh Karnataka aiawh Manjunath Marati te an inlen tawk hle. Lifter pahnih hian snatch-ah 121 kg ve ve an chawi a, vawi thum an chawiah an hlawhtling vek.

Clean & Jerk-ah Siaha tlangval Silvan-a'n 150 kg-a ṭanin a hlawhtling nghal a, Manjunath erawhin 140 kg aṭangin a ṭan thung. Silvan-a'n 160 kg a chawi hnuah 165 kg chawi leh tum mah se a hlawhling ta lo.

Chutihrualin Mizo tlangval hi clean & jerk-ah a che ṭha fal a, silver latu Manjunath hian 149 kg chauh a chawi thei. Silvan-a chawi zat belhkhawm hi 281 kg a ni a, 11 kg-in Manjunath aiin a chawi tam zawk a, gold medal a chawi chhuak.

Sairang tlangval tan Silver

65 kg inelnaah Laithanpuia'n snatch-ah 102 kg aṭanga ṭanin hlawhtling takin 106 kg a chawi leh a, a vawi thumnaah 110 kg chawi tum mah se a hlawhchham. Mizo tlangval aiin Assam aiawh Manuranjan Dhekia-a'n 109 kg chawiin a chawi tam zawk.

Clean & Jerk-ah Laia'n 125 kg aṭangin a ṭan a, 131 kg chawi leh bawk. Gold lak tumin Sairang tlangval hian 142 kg chawi a tum a, a hlawhtling ta lo. Mizo tlangval hian snatch leh clean & jerk-ah 237 kg a chawi a, gold latu Manuranjan chu 10 kg-in a pha lo.