Poch hoin PSG-in nomawi an chawi

Mauricio Pochettino chuan manager a nih hnua a hmasa ber turin nomawi a chawi ve ta. Argentine manager kaihhruaina hnuaiah Paris St-Germain hian Marseille 2-1 a hnehin Trophee des Champions an la.

Nilaini zan Lens khawpuia inkhelah PSG tan hliam dam hlim Mauro Icardi chuan goal hmahruai a khung bakah penalty a hlawh chhuak a, penalty hi amah ang bawka damkawr Neymar chuan an goal hnih nan a khung.

Goal hnih an phurh hnuah Marseille winger Dmitri Payet-a'n goal khat khung ve mah se awmzia a nei thui tawh lo. Tottenham manager hlui Poch-a'n PSG hi match thum chauh la kaihruai mah se atana mellung pawimawh a phun der.

Trophee des Champions hi Ligue 1 champion leh French Cup champion ten an inchuh ṭhin a ni a, England rama 'Community Shield' an inchuh nen angkhat a ni. PSG hian vawi 10 an lakna chiah a ni a, tun hnaiah a zawnin ṭum kua ngawt an la thei.

French champion tan title lak hi thil lawmawm a ni a, chutih rualin an thiampuipa Neymar chu hun rei tak hnua a inkhelh leh theih tak avangin lawmna tur a ni bawk. Brazilian forward hi Inrinni zana Angers an lenchilh hunah pawh a inlan thei zui ang.

Neymar bakah Icardi a dam chiang tawh. Argentine striker hian goal a khung bakah hun ṭha a sual chhuak hnem a, tawnhriat ngah Angel di Maria leh Kylian Mbappe ten ngai an awh leh tawh bawk avangin an ṭhat dan berin an khel leh ṭan tawh a ni.

Pochettino-a'n 2014-2019 chhung khan Tottenham a enkawl a, English club hi kawng hrang hrangin nasa takin hma a sawn pui. Champions League leh League Cup final thleng mah se nomawi a chawipui loh avangin an ban.

Kum 48 mi Poch chuan, "Ka hlimin ka lawm takzet. Paris Saint-Germain team thawhchhuah a ni a, club thuneitu lamin kan chunga rinna an nghah ngam vang a ni. Nomawi lian leh hlu zawk pawh kan lak chhunzawm ka beisei," a ti.

PSG hian an duh ber chu Champions League a ni. Season hmasa khan final lut mah se Bayern Munich an ngam lo, kumin last 16-ah Barcelona an hmachhawn dawn avangin Poch tan hna a hautak chho dawn hle.