Rodri-a'n Real pan a hreh lo

Manchester City midfielder Rodri chuan Real Madrid pan a hreh loh thu a sawi chhuak a, Champions League round of 16-a an ngam loh hlim club hi, "Khawvela club ṭha ber," tiin a sawi hial - City ṭantu tan ngaihthlak a nuam lo ang.

Kum 29 mi midfielder hian City tana a khelh hmain Atletico Madrid tan a lo khel tawh ṭhin a, Real hmelma kumhlun club tana lo khel tawh a nih avangin Spanish club hian thlem pawh ni se, a pan duh ring lotu an tam hle.

Mahse, Rodri chuan, "Atletico leh Real tana khel kawp player an lo awm nual tawh a, tunah a thleng nghal tut tut ang tihna pawh a ni chuang lo. Mahse, ka ngaihdanah chuan khawvela club ṭha ber chu hnar theih a ni lo a ni," a ti - Steven Gerrard leh Francesco Totti te a be lo a ni mai thei!

Atletico Madrid leh Real Madrid tana lo inlan kawp tawh player zingah Belgium goalkeeper Thibaut Courtois leh Spain forward Alvaro Morata te pawh an tel a, player pahnih hian Premier League-ah Chelsea tan an khel tawh ve ve bawk.

Rodri hian Manchester City-ah kum 2027 thleng khel turin contract a la nei mek a, City player ni chunga Real zawm chungchang a sawi duh danah Pep Guardiola a lawm lutuk lo mai thei!

Villarreal aṭanga a professional zinkawng zawh ṭantu Rodri hian kum 2019 khan Atletico aṭangin City hi a zawm a, English club tan inelna hrang hrangah match 293 khel tawhin, goal 28 a khung bakah assist vawi 32 a nei tel.

City tan nomawi 12 ngawt chawi tawhin, Premier League (4), FA Cup, League Cup (3), FA Community Shield, Champions League, UEFA Super Cup leh FIFA Club World Cup-ah te a champion pui a, 2022-23 season-ah phei chuan treble champion an ni hial.

Kum 2024 khan Ballon d'Or a dawng a, he mi ṭum hian Real Madrid chuan an player Vinicius Jr chu chawimawina dawng turah an ngai a, a dawn leh loh avangin Ballon d'Or semnaah an kal duh lo hial.

Rodri chuan, "Vini nen hian inhuatna engmah kan nei lo a, a hnathawh zozai avang hian ka zah em em bawk. Ballon d'Or dawngtu tur thlangtu chu mi dang daih an ni a, kan inkarah mi hian hem thlak an tum mai mai a ni. Mahse, buaina kan nei lo e," a ti.

Rodri hian Ballon d'Or a dawn hmain a khupah hliam a nei a, season khat vel inkhel thei loin a awm. May 2025-ah lo kir lehin, a hliam dam tawh mah se, a inhliam hmaa a khel erawh a la phak chiah lo tih a lang.

Spain international hian City-a a contract neih mek chungchangah, "Kan sawi ho a ngai ang," a ti a, "Spain-a kir leh hi chu ka duh ṭhin," a ti tel bawk - Real tana khelh a chak thu a sawi tel bawk a, Spanish club-in Rodri thusawi hi an lo ngaithla ve reng ang tih a chiang e.