Zaninah MSL khel chhunzawm tur hriat dawn

Mizoram Super League season 11 hmawr bawk a hnai zel a, zanin dar 5:30-ah Saron BC leh Chhinga Veng BC ten relegation game 3 an khel dawn a, a chak zawk zawk chu MSL-ah an inham tang dawn.

Zanin inkhela a chak lo zawk MSL aṭanga an tlak dawn avangin boruak a sang dawn a, inkhel hmuhnawm a beisei ngam.

Chhinga Veng an tho

Relegation game 1-ah Chhinga Veng BC vanduai mah se an vanduai reng lo a, 91 - 89 in Saron BC an hneh a, MSL-a inhamtan an tum hle.

First half-ah Chhinga Veng BC hian point 10-in hma an hruai hman a, harsa lutuk loin an chak dawn niin a lang hman. Mahse Saron an huaisen a, theihtawpin an bei let a, mahse an vanduai zan an tawng a, point hnih lekin an chak lo.

Chhinga Veng BC tan an foreigner King Revolution-a'n point 40 a score a, player of the match-ah thlan a ni bawk. Revolution bakah Dennis Lalmuanpuia (13), Vanlalhmangaihsanga (12) leh Lalhriatzuala (10) ten Chhinga Veng chak nan an thawh hlawk hle.

Saron BC tan player panga laiin point 10 an score tling a, Rookie of the Year ni lai Lalmalsawma'n point 21 neiin a score hnem ber. Mala hi a ṭhianten thlawp ṭha mah se hnehna an chang zo ta lo.

Inhamtan tumna

Tun season-ah Chhinga Veng BC-in a vawi khat nan MSL an khel a, beisei an phak lo thung. League round-ah Tuikual South BC chiah an hneh a, relegation game an khelh a ngai.

Mahse Chhinga Veng hi relegation game-ah an danglam a, vawi hnih an khelh tawhah point an score hnem a, game 1-ah a vanduai zawkah ṭangin point khat chauhin an chak lo.

Chhinga Veng coach Lalruatfela chuan,"Hma kan sawn chho a, kan foreigner khelhpui dan kan thiam tawh a, game 1-ah kan vanduai vangin kan chak lo hlauh thung. Kan player te an dam kim a, theihtawp chhuahin kan khel ang a, kan inhamtam ngei ka beisei," tiin Vanglaini a hrilh.

Hetihlai hian Saron BC in season bul an ṭan ṭha a, match hmasa berah Khatla TBL an hneh nghal a, Tuikual South BC an sawp zui bawk avangin an phur hle.

Mahse Saron BC par chhung a rei lo a, Zarkawt BCA, Zemabawk BC, Mission Veng Hotshots leh Chanmari BC te an hneh loh chhunzawm a, league round a zawh meuh chuan relegation game an khelh a ngai.

Saron BC coach Marc Lalthlamuana Sailo chuan,"Game 2-ah kan chesual zeuh a, kan foreigner Hugo a foul out hma lutuk avangin kan game a chhiat phah. Game hnuhnung berah Mala a inhliam a, game 3 khel turin a dinhmun a chiang lo a, a khelh lohna chance a sang zawk. Mahse chak lo zawk zawk tlak a nih tawh avangin theihtawp kan chhuah ang," tiin Vanglaini a hrilh.