Gyokeres-a'n hattrick a siam

Arsenal forward Viktor Gyokeres chuan Sweden tan World Cup playoff-ah hattrick a siam a, an ram hi playoff final a hruai thleng - an mikhualna ramah Ukraine chu 3-1 in an hneh.

Gyokeres hian Ningani zana an inkhelh hma hian qualifier-ah goal khung a nei miah lo. Mahse, World Cup khel lo thei dinhmuna an din meuh chuan Gyokeres ben harhin a awm a, hattrick a siam.

Arsenal striker hian minute rukna lekah goal hmahruai khungin, minute 51-naah a belhchhah a, penalty hmangin minute 73-naah a goal thumna a khung zui.

Ukraine tan Matviy Ponomarenko chuan goal khat khung ve mah se, minute 90-na a ni tawh a, awmzia a nei phak lo. Sweden-in playoff final an lut a, Poland an tum dawn avangin a awlsam lo ang.

Poland hian semifinal-ah Albania hmachhawnin, minute 42-naah Dinamo Zagreb midfielder Arbër Hoxha chuan Albania tan goal hmahruai a khung. Mahse, Poland hian Robert Lewandowski leh Piotr Zieliński hmangin an chhanglet a, 2-1 in an chak.

March 31, Thawhlehni zanah Graham Potter-a enkawl Sweden leh Poland te hian final an khel dawn a, a chak zawkin World Cup 2026 an khel ang.