Silly Point: IPL kan lo thleng leh ta!

2026 Indian Premier League chu zanin tlai hian khel ṭan a lo ni leh dawn ta reng mai, IPL team 10 ten inkhel 84 min hlui dawn. Champion lai Royal Challengers Bengaluru-in inelna ṭanna leh final an thleng dawn a ni.

Opening Ceremony awm lo!

Nikum lamah a ṭum khatna atan Virat Kohli leh a hote, RCB an champion a nih kha. Khami lawmnaa Chinnaswamy Stadium, Bengaluru-ah mipui nuai chuang pungkhawm chu an sapatalna lamah mi 11-in nunna an chan a nih kha maw. Chumi sunna leh hriatreng nan kumina IPL bul ṭanna tur Chinnaswamy khelmual lamah hian opening ceremony a awm dawn lo a ni.

Mit fukna tur

Cheng vaibelchhe 25 man, Australian all rounder Cameron Green hi ngaihven a hlawh lo thei lo a. India Test leh ODI captain Shubman Gill-a'n Gujarat Titans a rawn kaihruai dawn a, Gill hian India T20 squad-ah hmun a chang pha lo.

Gill hian selector-te thutlukna a chhanglet dawn a nih chuan tun IPL hi hun ṭha a ni dawn a, kumin inelnaa a che ṭha a nih phawt chuan India tan a inlan leh thei ang.

T20 World Cup-ah Sanju Samson a che ṭha a, Chennai Super Kings lamin Samson an la hi an tifuh dawn ruauin a lang bawk. Sunrisers Hyderabad tan nikum lama T20 khelhdan kalhmang rawn thlak danglamtu Travis Head leh Abhishek Sharma te inkawp hian ngai rawn awh thei tak maw?

Bul ṭan ṭhat a hlu

IPL thawnthu hlui zawng zawng han hai let leh ila, team tin te hi an intluk tlan em avang hian, league khelh laia bul ṭan ṭha leh points lo khawl ṭha te hi a team hlawhtling ber an ni deuh zel.

Kuminah pawh hian a la ni zel a rinawm a, bul ṭan ṭha lo team tan league stage chawhnu lamah thar han thawh leh chiam hi a har tawh ṭhin.

Chawm bawk, hawp bawk

Ka mimal rin danah, Chennai Super Kings hi bazarah an che fuh berin ka hria a. Delhi Capitals hian kum dang zawng aiin champion an tum ka ring a, chumi kawngah chuan eng lungtum mah lumsawn hmaih an neih ka ring lo.

Engpawh nise, tun thla 2 chhung chu cricket tui mite tan cricket i chawm ila, i hawp bawk mai ang aw.