Knicks-in Hornets ngam lo

NBA regular season khelh mekah nimin zing khan Charlotte Hornets chuan 114-103 in New York Knicks an hneh a, playoff khelh beiseina an chhi nung zel.

Spectrum Center, Charlotte-a inkhelah Hornets player te an inthlawp ṭha a, player pathumin point 20 an score tling. Kon Knueppel-a'n point 26 score-in a score hnem ber a, Knueppel hian reobound vawi 11 a lak bakah assist pariat a nei a, triple double a siam teuh hle.

Knueppel bakah LaMelo Ball (22) leh Brandon Miller (21) te an khel ṭha a, Miles Bridges leh Coby White ten point 17 neiin Hornets chak nan an thawh hlawk takzet.

Knicks tan Jalen Brunson-a'n point 26 neiin a score hnem ber a, OG Anunoby (17), Josh Hart (16), Mikal Bridges (14) leh Karl-Anthony Towns (13) te khel chhe lo mah se an vanduai ṭum an tawng a, a tlawm zawkah an ṭang.

New York Knicks hi playoff khel turin an tling chiang tawh a, an awmna hmun tur erawh a la chiang lo. Hornets lakah chak se Boston Celtics result a zirin pahnihnaah an awm thei a, mahse an dinhmun tichiang turin an nghah hret a ngai.

Hetihlai hian Hornets hi Eastern Conference-ah pakuanaah an awm mek a, match kua khelh tur la neiin playoff khelh phak an la inbeisei a, an chetsual a thiang tawh lo thung.