Ancelotti Brazil ngam loh France

Ningani zan khan friendly match-ah France-in 2-1 in Brazil an hneh a, France tan Kylian Mbappe leh Hugo Ekitike ten goal an khung - Brazil tan Gleison Bremer-a goal khung chu scoreline timawitu chauh a ni.

Inkhel ṭan aṭangin France an chungnung zawk a, chance hlauhawm an insiam nghal. Minute 32-naah Ousmane Dembele ball pek chu Mbappe-a'n chak taka um lutin, Brazil keeper Ederson chu cool takin a chip khum a, France-in hma an hruai.

Goal an chhuah hnuah Brazil an insiamṭha a, Manchester United player pahnih Matheus Cunha leh Casemiro ten an chance neih an chhawr ṭangkai thei lo a, first half-ah goal dang a lut tawh lo.

Second half-ah France defender Dayot Upamecano a chesual a, Brazilian full back Wesley a titlu a, referee-in yellow card pe mah se VAR en a nih hnuah red card a pe ta zawk a, kim loin France an khelh chhunzawm a ngai.

Didier Deschamps-a'n goal venhim an mamawh tih a hria a, N'golo Kante a luhtir a, Crystal Palace defender Maxence Lacroix a luhtir bawk. Friendly match a ni tih hriat loh khawpin team pahnihte an ṭang a, inkhel boruak a sang hle.

Brazil an insiamrem hmain France bawkin goal an khung leh a, minute 65-naah Liverpool forward Hugo Ekitike-a'n Ederson chu chip khum ve lehin an hmahruaina a belhchhah. Manchester City keeper hlui Ederson a mualpho.

Minute 78-naah Brazil tan Bremer-a'n hnai tak aṭangin a ball hmuh a tlawh lut a, an si phurh a sut ṭhen. Goal an khung hnuah Casemiro, Joao Pedro leh Vinicius Jr ten chance nei mah se goal hmaah an hriam tawk lo a, hun tawp zui nghalin, 2-1 in France an chak.

Carlo Ancelotti-a naute hian April 1, Nilaini zing dar 5:30-ah Croatia an hmachhawn leh dawn a, friendly tho ni mah se World Cup hmain match an ngah tawh lo a, an ṭhat dan ber an zawn theih nan ngaihthah a thiang lo a, tlawm nawn an duh tawh dawn lo.