Japanese GP practice-ah Piastri a che ṭha

Pathiannia ṭan tur Japanese Grand Prix inbuatsaihnaah Mclaren driver, Oscar Piastri chu pakhatnaah a thleng a, Mercedes driver pahnih George Russell leh Kimi Antonelli ten an tluk lo.

McLaren driver tho Lando Norris chu Lewis Hamilton leh Charles Leclerc te hmaah awmin, palinaah a thleng bawk a, Ferrari driver pahnih Hamilton leh Leclerc te hi an talbuai deuh a, Hamilton chuan a car khalh a rintawk loh avangin a muan phah niin a sawi.

Tun hnaia chanchin sawi tur ngah tak, Red Bull driver Max Verstappen erawh beisei a pha lo a, pasarihnaah a thleng. Dutch driver chuan,"Balance leh grip lamah kan talbuai deuh a, China-a thil thleng nen khan a inang chiah lo nain kan la hnufual hle.

Sector pakhata hetianga kan hnufual chhan hi kan la hrethiam lo, a bik takin medium leh high speed-ah kan thiam lo hle. Hei hi kan hmalak ngaihna lai a ni a, tunah hian thil kal dik lo tlem a awm a ni," a ti.

March 26, Ningania media day an hmanah Verstappen hi media lamin zawhna an pek danah a lawm lo. Season hmasa tir lam khan hi Spain-ah George Russell nen insuin, hemi chungchang hi journalist pakhat chuan a zawt a, zawhna zawttu chhuah hma hi chuan Verstappen hi a ṭawng duh tawh lo!

F1-a Honda hotupa Koji Watanabe chuan, an ram leilunga intlansiak tur an nih avangin theihtawp an chhuah tur thu a sawi.

Watanabe chuan, "Thawm ri leh nghing (vibration) awm ṭhin, a bik takin battery tichhe thei laka kan inven dan tur kan ngaihtuah ber a, chutihrualin Suzuka-ah hian chak zawka kan tlan theih nan energy management pawh kan tidanglam hret a ni," a ti a, an ṭang hle.