Bayern Munich an tla

German champion Bayern Munich chu DFB Pokal second round aṭanga pet tlak an ni. 2004 hnu lama a vawi khat nan Bundesliga hnuai lama mi an hneh lo, penalty shootout-ah second division club Holstein Kiel lakah 6-5 in an tlawm.

Nilaini zan inkhelah Bayern lamin Serge Gnabry leh Leroy Sane te hmangin ṭum hnih hma an hruai thei, mahse German Cup champion lai hian an tlarhnung phui lo an tuar - mualneitu lamin Fin Bartels leh Hauke Wahl te hmangin an sut a, hun pangngaiah 2-2 in an inhnehtawk.

Penalty shootout hmanga chak zawk zawn chhunzawm a ni. Penalty chhuihtu hmasa 10 ten an khung vek a, Kiel goalkeeper Ioannis Gelios chuan Marc Rota pet dansakin Bartels-a'n chakna goal a khung.

Bayern Munich hian tun hnai season 12 chhunga German Cup semifinal an luh phak loh vawi khatna a ni. 2004 khan second division club Alemannia Aachen 2-1 a hneh loin quarterfinal-ah an chak lo tawh bawk.

Hansi Flick naute hian season hmasa khan - Bundesliga, Champions League leh German Cup an chawi vek, kuminah erawh beisei angin season an hmang dawn lo niin a lang, insiamṭhat an mamawh hle.

An league match hnuhnung berah Borussia Monchengladbach an ngam lo a, cup inelna lamah an tlak zui avangin Flick-a nauten hrah thar an mamawh - Pathianni zanah SC Freiburg an hmachhawn leh ang.

Bayern manager Flick chuan, "Nomawi pathum kan kawl kha humhim ngei kan duh a, hetiang result kan nei hian min barakhaih hle. Kan thil tum hlawhtling ta chiah lo mah se indem tur kan awm lo, mimal ni loin team mawhphurhna a ni.

"Kiel khan fak an phu, cup inelna a nih ang takin an khel chhuak a ni. Tun hnaia kan tihsual aṭangin insiamṭhat ngei kan mamawh a, a bik takin tlarhnung lam kan remphui a pawimawh dawn," tiin a sawi.

Holstein Kiel manager Ole Werner chuan, "Hetiang ni hi nitin a thleng thei lo, hun rei tak chhunga thleng ve zeuh zeuh chauh a ni a, chuvangin hnehna kan chan hi nasa takin kan lawm tur a ni ang," a ti a, a thui thei ang ber kalpui a tum thu a sawi bawk.