Harden-a'n Nets a pan?

United States lamah chuan media hrang hrangin James Harden chanchin an ziak a, tun hnai season thum chhunga NBA point nei hnem ber ni thei hian Houston Rockets aṭanga Brooklyn Nets an zawm thu an sawi - official a puan erawh a la awm lo.

Rockets hian tun kartir lam khan Los Angeles Lakers an hneh lo, an chak loh hnuah Harden hian NBA champion thei zingah an tel loh thu a sawi - Nilaini khan training a nei lo zui a, he thu i chhiar meuh chuan Nets a zawm fel tawh tura ngaih a ni.

American guard Harden chuan, "Rockets hi champion turin kan ṭha tawk lo, chutih rualin he khawpui hi chu ka ngaina hle thung. Team tan hian ka theih ang tawka sang chu ka ti tawh, ka theihna in a phak loh thil a awm a ni," tiin Rockets thlahna thu a sawi fel tawhah a ngaih theih.

Nets hian Kevin Durant an nei sa tawh a, vanglai hmang mek Harden an neih belh bawk a nih chuan Eastern Conference mai ni loin NBA champion nih an tum ngam ang. Nimin zing khan Nets hian New York Knicks 116-109 in an hneh.

Nimin zing Western Conference inkhel dangah Giannis Antetokounmpo chuan basketball a khelh hun chhunga a vawi 20 nan triple-double a nei. Greek tlangval hian 22 points, 10 rebounds leh 10 assists neiin Milwaukee Bucks chu Detroit Pistons lakah 110-101 in a chakpui.

Eastern Conference hmahruaitu leh NBA champion ni bawk Lakers pawhin Oklahoma City Thunder 128-99 in an hneh a, Lakers tan hian nidang ang bawkin LeBron James a che ṭha - American star hian point 26 neiin a team tan a thawhhlawk hle.

NBA Results

Brooklyn Nets    116 - 109    New York Knicks

Milwaukee Bucks    110 - 101    Detroit Pistons

Los Angeles Lakers    128 - 99    Oklahoma City Thunder

Los Angeles Clippers    111 - 106    New Orleans Pelicans

Dallas Mavericks    104 - 93    Charlotte Hornets

Portland Trailblazers    132 - 126    Sacramento Kings

Memphis Grizzlies    118 - 107    Minnesota Timberwolves