Mikhual Chennai lakah Aizawl FC chak zo lo

RG Stadium-a floodlight hnuaia I League game hmasa berah Aizawl FC-in hnehna an chang zo lo a, an mikhual Chnennai City nen 1-1 in an inhnehtawk.

Aizawl FC tan William Lalnunfela'n minute kuanaah goal hmahruai khung mah se penalty hmangin Chennai City-in an chhanglet a, hun tawp thlenga goal dang lut loin 1-1 in an inhnehtawk. Standly Rosario leh Chennai City coach Akbar Nawas ten inkhelh hmain point thum aia tlema an lungawi loh tur thu Vanglaini an hrilh ve ve a, mahse coach pahnih hi point khata an lungawi ve ve a ṭul thung. 

Aizawl FC in match li an khelh aṭangin point nga chiah an la nei a, Mizo club hian December 20, zan dar 7:00-ah Punjab FC an mikhual leh dawn a, nuam taka Krismas hmang turin tlawm a thiang tawh lo. 

Aizawl FC coach Standly Rosario-a'n MPL lama a hman thiam sa player-te a ringtawk a, 4-4-2 formation a rawn hmang. Tlarhmaah Abdoulaye Kanoute awm loh avangin William Lalnunfela leh Alou Sissoko inkawptir an ni. Midfield-ah ṭumdang ang thoin Alfred Jaryan leh Paul Ramfangzauva an inkawp a, mual sir aṭangin Isak Vanlalruatfela leh Rochharzela ten an thlawp. Tlarhnungah Richard Kassaga, C. Lalrosanga, Ramhmunmawia leh Joe Zoherliana te an ding a, MPL best goalkeeper Lalremruata chu si ban nghak a ni.

Chennai City in season hmasa I League a goal 21 khungtu Pedro Manzi rawn hruai mah se squad-ah telh a ni lo a, Spanish forward hian RG stadium a training a neihna lamah a inhliam thu Vanglaini a hrilh a, tlarhmaah Katsumi Yusa dah a ni. Midfielder thiam bik Adolfo Miranda pawh hliam vangin a inlan thei lo a, chennai club in an Spanish player neih ṭhat pahnih an chhawr theih loh avangin inkhel ṭan hma aṭangin AFC dinhmun a tha.

Inkhel ṭantir aṭangin Aizawl FC in game an thunun nghal a, minute kuana lekah William-a'n captain Alfred Jaryan ball siamsak ṭha zet chu goal-ah a chantir a, RG stadium thawm a ṭha hle. Chennai City in nawr let an tum a, ball inpe tam kual mah se MPL season ṭantir aṭanga khel ho tawh Aizawl tlarhnung an su hawng zo lo a, Mizo club-in khelh dan phung bel sa an neih avangin Chennai tan a harsa.

Mahse, minute 41-naah Lalrosanga a chesual a, Aizawl FC defender hi fimkhur tawk loh vangin a handball. Referee-in penalty spot a kawk a, Chennai Spanish captain Roberto Eslava chuan cool zetin goal-ah a chantir.

Aizawl FC in theihtawp chhuahin nawr let tum mah se tawnhriat nei ṭha Eslava hoa ding Chennai tlarhnung an su hawng zo lo a, 1-1 in first half a tawp.

Second half-ah AFC tan William leh Sissoko te an tlan tam a, goal khung theihna remchang pawh vawi tam an nei. Mahse, goal hmahruai khungtu William-a ke a hmui tawk lo a, a vanneih zan ni se scoreline ti danglam turin chance a ngah tawk. 

Chennai City an talbuai a, an talbuaizia pholangtu chu khelmuala captain Eslava leh Charles Anandraj te intibuaiin a hrilhfiah a, mahse Mizo club-in an mamawh ber goal an khung thei chuang lo. South Indian club tan Suhail Pasha chu rawn hlauhawm ve ṭhin mah se Mizo club tan harsatna liantham a thlen thei lo a, AFC keeper Arema chu hun harsaah a rintlak ṭhin bawk. 

Aizawl FC rampawn player zingah Richard Kassaga leh captain Alfred Jaryan an rintlak chhunzawm zel a, Sissoko leh nimin match hmaa Kanoute khelh dan en erawh chuan foreigner dang hi an la la fuh tawk lo niin a lang. 

AFC coach Standly chuan, "3-1 tala chak thei tur kan ni a, William-a vanneih ṭum a ni lo a ni. MPL kan khelh tel avangin game kan khel hnem a, mahse Mizo player ka duhna em em chu khatiang game harsaah pawh khan chau lo ang maiin an khel a ni," a ti. 

Indian Arrows laka goal a khung hnua Chennai laka khungtu William chuan," Goal khung turin theihtawp ka chhuah chhunzawm dawn a ni, " a ti a, hmasawn zel a tum thu a sawi. Chennai coach Akbar Nawas chuan," Kan result a fair tawk ka ti a, mahse chak tur an awm a nih chuan chak kan phu zawk a ni," tiin Vanglaini a hrilh. 

Standly chuan," Coach chuan an team hi chak phu zawkah an ngai zel a ni," tiin Nawas a thusawi a chhang a, lai taka thlir in chak phu zawk an nih thu a sawi.