Khatla TBL-in final lut

Inrinni zan Mizoram Super League khelhah Khatla TBL chuan 73-49 in Mission Veng Hotshots an hneh a, MSL 11 final an lut. TBL hian Zemabawk BC leh Zarkawt BCA inkhela chak zawk zawk nen champion nomawi an inchuh dawn.

TBL nge nge

Semifinal game 1 aṭang tawhin TBL-in harsatna an tawk lo a, game 2-ah pawh inkhel an thunun tluan. Makhel Ahkim Mitchell chuan point 23 neiin, rebound vawi 25 zet a la a, player of the match-ah thlan a ni.

Mitchell bakah Vanlalṭhazuala (13), Amjoy Singh Gill (13), Lalhmangaihzuala (10) ten TBL chak nan an thawh hlawk hle. TBL tan tun season-a inlan tam lo player ṭhenkhat an lut nual a, team pahnih an inthlau hret tih a pholang.

Mission Veng Hotshots-in zan dang an pha lo a, League round lama an innghahna an foreigner Darnell Johnson-a'n beisei a pha lo takzet a, Johnson hian point 13 a score a, tun season-a a score tlem ber ṭum a ni. Tunlai ṭawngkam takin a 'zawi' deuh tih a hmuh theih.

Inter state player Japjit Singh Gill chu Johnson aiin a langsar zawk a, ball kawltu ber a ni. Gill hian point 18 nei mah se amah thlawptu tura ngaih, Lalruatkima leh Darnell Johnson te an khelh ṭhat tawk loh avangin a team a chakpui zo lo a, MSL an mangṭha a ngaih phah.

Khatla an tlo

Tun season-ah Khatla TBL hian bul an ṭan ṭha lo a, match hmasa berah Saron BC an hneh lo. Mahse Saron lakah an foreigner leh an captain Vanlalṭhazuala te an inkhel lo.

Saron an ngam loh hnuah an insiamṭha nghal a, league round-ah hneh loh an nei tawh lo. A rei tulh tulh a, an ṭha tulh tulh emaw tih mai tur an ni a, final-a inhlangkai hmasa ber an ni.

Hetihlai hian Hotshots an duai bik lo a, MSL-a an rawn kir hnuah an inthlahrung lo a, semifinal an khel pha nghal. An coach Vanlalhruaitluanga sawi tawh ṭhin angin an squad chhah lo mah se, player te an inlungrual a, chu chu an thlensanna chhan lian tak a ni.

Hotshots hian zuam sual theih an ni tih an lantir tawh a, season thara MSL khelh a nih leh hunah club dang pawh an fimkhur viau a rinawm.