MSL-ah Saron BC inham tâng

Inrinni zan MSL Relegation match-ah Saron BC leh Chhinga Veng BC ten game 3 an khel a, inkhel inhnehtawk takah Saron BC-in 81-76 in Chhinga Veng BC an hneh. Marc Lalthlamuana naute a vannei zawkah an ṭang a, MSL khel turin an inhamtang.

Inkhel ṭan aṭangin boruak a sang nghal a, team pahnihte MSL-a inhamtan an tum hle. Chhinga Vengin hun tam zawk hma an hruai a, second quarter leh third quarter-ah an inthlauhna hi point 14 zet a nih hman hial. Saron lamin Rookie of the Year ni lai Lalmalsawma hliam vanga an chhawr theih loh avangin an chak loh mai a rinawm hle.

Mahse Saron-in huaisen takin an bei let a, an inter state player Samson Stephen Sandhu-an danglamna a siam. Saron BC lamin third quarter-ah point score an harsat a, an basket a tan rei lai takin Stephen hian game a rawn thlak danglam.

Stephen hi hnam dang player nen khaikhin chuan a lian lem lo a, mahse a ball ken a ngheh bakah ball a sem thei a, a ṭul hunah a shoot theih bawk a, Chhinga Veng BC tan buaina tham a tling. Stephen hi third quarter aṭang chauhin lut mah se a khelh chhunah a khel ṭha a, Point 20 nei hmanin player of the match-ah thlan a ni a, Saron chakna hnar a ni.

Saron chakpuitu Stephen chuan inkhelh banah, "Second leh third quarter-ah kan point a inthlauh hman avangin ka teammate te an hnual hman a, mahse match hmasa lamah point 10-a kan inthlauh pawhin kan pawt thla leh thei a, chuvangin ka ṭhiante ka fuih a, theihtawp kan chhuah avangin kan chak a ni," a ti.

Chhinga Veng BC tan an foreigner King Revolution (34) a khel ṭha a, Mizo player zingah three point contest champion Lalhruiatzuala (15) leh Vanlalchhuanawma (11) ten theihtawp chhuah mah se a vanduai zawkah an ṭang a, MSL aṭangin an tla.

Saron BC coach Marc Tetea Sailo chuan, "Team dang chuan cahmpion turin an khel a, keini chuan tlak loh kan tum ber a ni. Kan la khel chho zel ang a, muangchangin a chung ber a kai chhoh kan tum ve ang," tiin a sawi.