Miami Open-ah Sabalenka a champion

World number one Aryna Sabalenka chuan nimin khan Miami Open final-ah Coco Gauff chu 6-2, 4-6, 6-3 a hnehin a champion. Tun season-ah Sabalenka hian Indian Wells-ah nomawi a chawi tawh bawk a, Iga Swiatek (2022) hnua 'Sunshine Double' thei leh hmasa ber a ni.

Season khata Indian Wells leh Miami Open champion kawp thei hi Sunshine Double tih a ni a, hmeichhe tennis player zingah Sabalenka leh Swiatek hma hian Victoria Azarenka, Kim Clijsters leh Steffi Graf te chauh an la awm.

Kum 27 mi Sabalenka hian kuminah inelna bul a ṭan ṭha a, WTA Tour-ah vawi thum champion tawhin match 24 a khelh tawh aṭangin vawi 23 a chak. A chak loh awmchhun hi kumin Australian Open final-a Elena Rybakina a hneh loh kha a ni.