Tuchel-a 'England' an nung tawk lo

England-in Wembley Stadium-ah Uruguay an mikhual a, 1-1 in an inhnehtawk. Three Lions tan Ben White-a'n minute 81-naah hmahruaina goal khung mah se mikhual lamin Federico Valverde hmangin injury time-ah an sut.

Zirtawpni zan inkhelah White a langsar a, minute 69-naah bench aṭanga rawn lutin England ṭantuten an au el. Arsenal defender-in huat a hlawh chhan hi World Cup 2022-a Qatar aṭanga a mah duhthu ngeia inelna khelh chhunzawm lo a, haw a thlan zawk vang a ni.

White hian amah au eltute goal hmangin a chhanglet a, goal vangin England ṭantute an lawm. Mahse, injury time-ah White hian penalty a chawi a, Real Madrid captain Valverde-a'n si phurh sut nan a hmang.

Thomas Tuchel-a hote hian March 31, Thawhlehni zan dar 12:15-ah Japan an hmachhawn leh dawn a, World Cup khel tura inrintawkna an neih theih nan game nung ṭha zawk an khelh ngei a ṭul ang. England manager Tuchel hian tun international break hi player enchhin nan a hmang a, Japan an hmachhawn hunah chuan Harry Kane pawh a inlan tawh ang.